Shillong, Naiwieng 11: Palat 6,200 ngut ki khynnah ki la pyndep ïa ka physical test kaba la buh ryntih kum shi bynta jong ka sien pynlong kaba lai jong ka Talent Identification Programme (ka prokram wad bad ithuh sap na bynta ki khynnah) jong ka sorkar jylla bad ka Meghalaya State Olympic Association.
Kane ka sienjam kaba lai ban pynlong ïa ka Talent Identification Prokram la sdang naduh 14 tarik u Lber bad ka thmu ban khmih bñiah ïa 10,000 ngut ki khynnah kiba naduh 6 haduh 15 snem.
Ka jingkhmih bñiah (Test) kaba dang shen ka la sdang naduh 21 tarik Risaw ha Shillong bad nangta ka la poi sa sha Khliehriat, Jowai, Nongstoin, Mairang, Bhoirymbong, Nongpoh, Tikrikilla bad ka la kut ha Ampati ha ka 06 tarik mynta u Naiwieng. ïa kane ka kynhun ki nongkhmih bñiah (test) la synranlang da ki dkhot jong ka MSOA u bah Dipshon Ryntathiang bad u bah John F Kharshiing.
Na ki 6,241 ngut ki khynnah, 2,589 ngut ki dei na ki jaka hikai phutbol (football grassroots centre) ba la kyrshan da ka sorkar bad 3,652 ngut ki dei na ki skul bapher bapher.
Ha ka jingpynbna, ka MSOA ka la ong ba ka la shem biang ïa ki khynnah kiba pyni ïa ka jingstet bad kiba khlaiñbor na ka bynta ka rta jong ki. Kum ka nuksa ha Ampati, ki don ki khynnah kiba dang ha ki 15 bad 16 snem kiba la shimpor tang 5.7 sekhon bad 6.02 sekhon ha ka ‘compass drill’, kaba la pynkheiñ ïa ka jingthew kyllum pyrthei (international benchmark) kaba long 8 sekhon. Ha ka jingmareh ïa ka 20m, la ïoh ban buh jingkheiñ ba ki la don ki khynnah kiba la lah ban pyndep ïa ka por kaba 3.06 sekhon bad 2.85 sekhon, kaba marïabiang bad ka por ba la buh 3 sekhon.
Ka jingthmu ha lyndet da kaba khmih bñiah ïa ka jinglong ka met jong ki khynnah kalong ban pynbeit ryntih bad ban ïoh jingmut kano ka jait jingïalehkai kaba kham ïadei bad kitei ki khynnah, ym tang ïa kaei kaba maki ki sngewtynnad. Kum ka nuksa, lada u khynnah uba sngewtynnad ïa ka phutbol hynrei ka jingkheiñ jingthew jong u ka long kaba sniew ha u Compass (ka jingthew ïa ka jingstet ryngkat ka rukom khih ka met ka had jong ki khynnah) hynrei ka jingkheiñ kaba paw ha ka jingmareh 20m ka long kaba bha, te kamut ba ka Athletic ka long kaba ïahap kum ïa kine ki khynnah.
Na bynta kito kiba la lehbha bad ïoh ka jingkheiñ kaba thikna ha ka por ba shim bynta ïa ka test la nang shimkhia shuh shuh da ka synjuk, ryngkat bad ki kynhun ba mynshuwa kiba leit sha ka Prokram Elite Pathway (EPP) bad ka Super EPP ha kaba la hikai ïa ki da ki riew shemphang.
Namar ba bun ki skul ki la jan sdang ïa ki eksamin ïa kane ka prokram ban ithuh ïa ki sap ïalehkai jong ki khynnah (talent identification programme) la pynsangeh shuwa shipor bad kan sdang biang ha Garo Hills ha ka taïew ba nyngkong jong u bnai December, la pyntip ka MSOA.
