Palat 600 tylli ki skul sorkar bad skul SSA yn kynthup lang hajuh ha ka kylla ba nyngkong

Shillong, Jymmang 27 : Ka tnad pule puthi jong ka jylla ka la buh thong ban pynbeit ryntih ïa palat 600 tylli ki skul sorkar bad ki skul Samagra Shiksha Abhiyan (SSA), kiba don marjan ha ka kylla ba nyngkong hapoh une u snem.
Haba kren bad ki lad pathai khubor, u Commissioner & Secretary ka tnad Pule Puthi jong ka sorkar jylla, Vijay Kumar Mantri u la ïathuh ba kaneka sienjam ka long ban pynduna ïa ka mang tyngka halor ka jingpynlut tulop jong ki nonghikai. La ïathuh kumba ka long mynta, ka jylla Meghalaya ka pynlut palat 2400 klur ha kaba siew tulop ïa palat 40,000 ngut ki nonghikai ha kaba ki nonghikai skul sorkar ki don tang 7,000 ngut.
U Commissioner & Secretary u la ïathuh ruh da kaba ong, “Ngi dang pyrshang ban pynbeit ryntih ïa ki 600 tylli ki skul sorkar bad ki skul SSA, kiba don marjan ha ka kylla kaba nyngkong.”
Nangta u ong ruh ba ha ka jingshisha hi, ki skul SSA ki dei ki skul sorkar. “Phim lah ban don ar tylli ki skul sorkar ha kajuh ka jaka marjan. Kumta ngi la pyrshang ban kynthup lang hajuh bad ngin sa peit pat ka jingdon ka l ong kumno bad kumta ngi la pyrshang shwa 600 tylli ïa mynta u snem hi,” u la bynrap biang.
U Mantri u la pyntip ruh ba ka tnad ka pynshlur ruh ïa ki skul shimet ba kin sdang lang ïa kane ka jingpynbeit thymmai.
“Namar ki don ki skul deficit ha kaba ki nonghikai ki ïoh ïa ka tulop sorkar. Kumta, ngi la bthah ïa ki District School Education Officers (DSEOs) ban pynshong nongrim lada jïa ba kawei ka skul kam don khynnah skul nangta phi phah noh ïa ki nonghikai sha kawei pat ka skul ba marjan hakaba ka jingdon ki khynnah ka kham bun,” u la ong.
Katkum ka jingong jong u, ka Meghalaya ka la don palat 55,000 ngut ki nonghikai lada nujor bad kiwei pat ki jylla jong ka thain shatei lam-mihngi jong ka Ri.
Shuh shuh u la ong ba namar kane ka jingeh, tang khyndiat eh ka don ka mang tyngka na ka bynta ban pynbha ïa ki jingtei jong ki skul ha ka jylla haba jubab ïa ka jingkylli halor ka jingbun ki skul ba la jot ha ki bynta bapher bapher jong ka jylla.
“Ka jingpynbit pynbiang ïa ki iing skul kadei ka mat kaba eh bha. Lada phi ïohi mynta ha ka mang tyngka jong ka pule puthi, haduh 2400 klur ki leit tang na ka bynta ka tulop kumta tang khyndiat eh ka mang tyngka ka don na ka bynta ban pynbha ïa ki jingshna ïa ki iing skul, khamtam haba kane ka jylla kadei kaba ïoh jur bha u lapbah kumta ban maramot man ka por ka dei ka kam kaba eh bha”.
Tangba la katta pat u ong ba lyngba ka skim na ka Asian Development Bank (ADB) ki la shim haduh 65 tylli ki skul na ka bynta ban kyntiew kyrdan bad ai ïa ki kamra iing skul kiba thymmai.
“Ngi don ruh ïa ka Mission Education bad hapoh kane ka sienjam ki don ar tylli ki bynta kiba la dep bad bun ki skul ki la shah kynthup. Kumta ki dang don bun shuh ki skul kiban shah kynthup ha ka bynta kaba lai bad kiban dang bud biang katkum ka jingmang tyngka.”
Haba jubab halor ka jingkylli, u Commissioner & Secretary u la ong ba tang na ka bynta ki skul haduh 2,400 klur tyngka ki pynlut na ka bynta ka tulop ki nonghikai bad na ka bynta ki college pat ki pynlut haduh kumba 300 klur tyngka man u snem bad ka sorkar ka kyrshan ruh sa 40,000 ngut ki nonghikai bad na kine 7,000 ngut ki dei ki nonghikai ha ki skul sorkar katba kiba bun ki dei ki nonghikai ha ki skul shimet.
Kumta, u ong ba ka jingkynthup lang ka long kaba kongsan haduh katta katta bad kumta ki la sdang shwa na ki skul SSA bad ki skul sorkar, kaba mut da kaba kynthup lang la ka long naduh ki khynnah haduh ki nonghikai. U ong ruh ba da kaba leh kumne ka jingpynlut ha ka tulop kan kham duna bad lah ban pynbun pat ha ka jingpynbha ïa ki jingtei ïa ki iing skul.