Palat 60 hajar kin ïoh kam na ka jngohkai pyrthei, ong u Myntri Rangbah

Shillong, Lber 10 : U Myntri Rangbah ka jylla Conrad K Sangma ha ka sngi Nyngkong u la ong ba ka sorkar jylla kan thaw bun ki lad ki lynti na ka bynta ban ïakhun ïa ka jingkyrduh kam ki samla ha kane ka juk mynta.

Haba jubab ïa ka jingïatai halor ka Mangtyngka, u Myntri Rangbah u la kdew ruh bun tylli ki kabu na ka bynta ban pynmih kam kynthup ïa ka jingkyrshan ban seng kam lajong.

U Myntri Rangbah u la ong ruh ba ka sorkar jylla ka la ïakhun tyngeh na ka bynta ki lad ïohkam ïohjam lyngba ki kam jngohkai pyrthei, nangta ka Self Help Group (SHG) bad ruh ka skill development. U ong ruh ba lyngba ka mangtyngka kaba 2,896 klur tyngka na bynta ki kam jngohkai pyrthei, kan ïarap ban pynmih haduh kumba 60,817 tylli ki kam ba thymmai. U ong ruh ba ha ki shnong pat, ka jingdon ki SHG mynta ka la kiew na ka 5,894 tylli ha u 2018 sha ka 51,674 tylli ha u 2025, kaba la ktah bad pynmyntoi ïa kumba 4 lak ngut ki nongshong shnong lyngba ki jingkyrshan pisa bad ki jingkyrshan seng kam lajong.

Nangta, u ogn ruh ba lyngba ka CM Skills Mission (2025-28) la buh thong ban pyntbit ïa kumba shi lak ngut ki samla, ban pynkupbor ïa ki ba da ki jinghikai bapher bapher katkum ka jingdonkam ha ki shnong, ha ka ri, bad wat shaba ri kumjuh ban pyntikna ba ka Jylla ka la long kaba pynkhreh ban don ïa ki nongtrei kiba la pyntbit.

U Myntri Rangbah u la ong ruh ba da ka jingkiew jong ka IT, khamtam eh ka Shillong Tech Park Phase I & II bad kumjuh ka Tura Tech Park, kiba la khmih lynti ba kin ai kam kumba 22,000 ngut. “Ngi la pynskhem ïalade na ka bynta ka kamai kajih kaba khlain na ka juk digital ha Meghalaya,” u la ong.

Ha kajuh ka por, u Myntri Rangbah u la ktah ruh ïa ka phang kaba ïadei bad ka tnad bording da kaba ong ba ka jylla ka la hiar ïa ka jingduh nong ha ka Aggregate Technical & Commercial (AT&C) na ka 32 persen sha ka 17 persen da kaba pyntikna ruh ba ka jingïoh bording ha ka jylla kan long kumba 22.61 kynta.

Haba jubab pat halor ka jingud ba ka don ka jingkyrduh umbam, u Myntri Rangbah u lapyntip ba ka la donka jingkiew kaba haduh 57 shah ha ka jingmang pisa ha ka Jal Jeevan Mission ha kaba la ïarap ban pynheh ïa ka jingpynpoi ïa ki umbam na ka 4,550 tylli ki longiing ha u 2019 sha ka 5.33 lak tylli ha u 2024.

U Myntri Rangbah u la batai bniah kumno ka sorkar ka kyntiew ïa ka rep ka riang bad ka roi ka par nongkyndong lyngba ka prokram CM FARM+, kaba thmu ban pynïar ïa ka jaka rep kaba 22,916 hetctare bad la khmih lynti ba kan ai kam ïa ki 71,436 ngut. Ki jingthung kum u  shynrai Lakadong, u cardamon heh, u sohmrit khlaw, bad u kophi la  pynïaid iew ban kyntiew ïa ka ïoh ka kot jong ki nongrep.

Haba jubab halor ka jingkylli na ka Liang Pyrshah kaba ïadei bad ka jingkyntiew kyrdan ïa ki 2611 tylli ki skul, u Myntri Rangbah u la kular ha Iing Dorbar ba ka sorkar ka shimkhia bha ban pyndep ïa ka kam ha ka por. “Ka pule puthi kadei ka bynta kaba hakhmat eh hangi bad ngin pyntikna ba ki skul jongngi kin lah ban ai ka jingshakri kaba paka tam eh,” u la ong.