Nongstoiñ, Lber 10: Kumba la ioh jingtip ba ka jingpynlong ïa ki jingïakop pynïatur masi kyrtong ka jur bha hapoh ka district, khamtam ha ka por ba pynlong ïa ki Fete bad kiwei pat ki tamasa ha ki katto katne ki bynta jong ka Eastern West Khasi Hills District, kumta ka District Magistrate jong ka Eastern West Khasi Hills District, Mairang ka la pynmih ïa ka hukum ha ka bor ba la pynkup ha ka Section 163 BNSS, 2023, ka la khang pyrshah ban pynlong ïa kino kino ki jingïakop ïatur masi kyrtong hapoh ka District baroh kawei, bad ka la maham tyngeh ba kino kino kiba pynkheiñ ïa kane ka kyndon kin ngat ha ka jingshah pynshitom katkum ka kyndon aiñ.
Kane ka hukum ka ong ruh, lada shah ban pynlong ïa ki jingïakop pynïatur masi, kan pynkheiñ ïa ka kyndon 11 jong ka Prevention of Cruelty to Animals Act, 1960 bad ïa ka hukum jong ka Ïingbishar Supreme Court jong ka India kaba la khang pyrshah ïa kiba kum kine ki jingïakop pynïatur masi kyrtong ha ka hukum ba la pynmih ha u snem 2014. Kane ka hukum kan treikam noh mardor tad haduh ban da pynbna da kumwei pat.
