Shillong, Nailur, 19: Palat 510 tylli ki Lower Primary bad Secondary Schools ha kylleng ka jylla kiba la jot.
Ïa kane la pyntip da u Myntri ka tnat Pule Puthi ka Sorkar Jylla u Rakkam A. Sangma ha ka jubab ïa ka jingkylli ba la wanrah hapoh ka Dorbar Synrai ha ka sngi Baar. Na kine, 495 tylli ki dei ki Government Lower Primary School bad 15 tylli ki dei ki Government Secondary Schools, la ong u Sangma.
U la ong ruh, 43 tylli ki skul ki dei kiba la pynrung ha ka wat kaba nyngkong ban maramot, katba 20 ha ka bynta ka wat kaba ar bad 332 ha ka wat kaba lai. Katkum ka jingong jong u, sa 115 tylli ki skul kiba dang sah yn sa phah ïa ka jingtyrwa ban maramot ha ka wat ka ban sa wan.
