New Delhi, Nailur 19: Ka kynhun Myntri jong ka Sorkar NDA ha ka sngi Nyngkong, ka la ai ka jingmynjur ïa ka Women’s Reservation Bill. Kane ka la jia ruh hadien ka sngi shong dorbar ba nyngkong jong ka Dorbar Kyrpang ka Parliament, ka ban long 5 sngi lynter.
Kiba la wan ïashimbynta ha kane ka jingialang ki kynthup ïa u Amit Shah, Rajnath Singh, Piyush Goyal, S Jaishankar, Nirmala Sitharaman, Pralhad Joshi, Dharmendra Pradhan, Nitin Gadkari bad Arjun Ram Meghwal.
Ka Kynhun Myntri ka la mynjur ruh ban wanrah noh ïa kane ka Women’s Reservation Bill hapoh ka ïing Dorbar.
Kane ka Women’s Reservation Bill ba la mynjur da ka Rajya Sabha ha u snem 2010, ka don ïa ki kyndon ban ai bhah ba 33 % ïa ki kynthei ha Parliament bad ki ïing Dorbar Thaw Aiñ ki Jylla.
Kat kum ka khubor, bun ki Myntri ka BJP bad ki MP ki la shah bthah ban wanrah ïa ki constituency ba mihkhmat da ki kynthei sha Parliament ha ki sngi ban wan. U President ka BJP JP Nadda ula ïakynduh ruh ïa bun ngut ki Myntri bad MP ka Party ha ka sngi Nyngkong.
Ki mat kiba phi dei ban tip
Ka women’s reservation bill ka pynthikna ïa ka bhah ba 33 percent ïa ki kynthei ha Parliament bad State Assembly
Shibynta na ka lai bynta ki seat ba la buh bhah ïa ki Scheduled Caste bad Schedule Tribe yn ai bhah noh sha ki Kynthei na kine ki kynhun.
ïa ka jingai bhah lah ban ai da kaba ïa ai bujli sha ki constituency bapher bapher ha ka Jylla lane ki Union Territory.
Kane ka jingai bhah ïa ki Kynthei kan kut noh 15 snem hadien ba pyntreikam ïa kane ka Amendment Act.
ïa ka Women’s Reservation Bill la wanrah nyngkong ha u snem 1996 bad ka Rajya Sabha ka la ai jingmynjur ha u bnai Lber 2010 hynrei ka la iap noh hadien ba ka Lok Sabha kam shym la ai jingmynjur ïa ka.
