Mawlynnong, Nailur 17: Hynnin ka Sngi Saitjaiñ (16 tarik, Nailur) ka Ministry of Tourism, GoI (NE), Meghalaya Tourism & Sportive ha #Mawlynnong, East Khasi Hills, Meghalaya, ka la ïoh ban pynlong ïa ka jingïakop marehthong kaba ar ïa kaba la tip da ka Mawlynnong Run Safari.
Ha kane ka kynti, ki la don haduh 210 ngut ki nongïakop mareh kiba la wan ban ïashimbynta ha kane ka jingïakop mareh ban pyndep ïa ka 25 km, 10 Km & 5 km ka jingjngai.
Ki dkhot jong ka Yuva Tourism Club, ki samla pule, ki Engineer, ryngkat bad ki longkmie ki la snohktilang ha kane ka jingïakop mareh. La sakhi ruh ïa u Wanmenaki Jeremiah Nongrum, u khynnah ba dang 5 snem bad ruh u ba rit rta duh ha kane ka jingïakop marathon u ba la mareh ryngkat bad ka kmie ka jong u.
Kane ka lympung ym tang ba ka pynskhem ïa ka jingïadei hapdeng ka ri bad ka Bangladesh hynrei ha kaba ïadei bad ka jingsngewthuh briew para briew.
Ka jingthmu jong ka MoT da kaba pynlong ïa kane ka jingïakop mareh ka long ban kyntiew ïa ka kam jngohkai sha ki thaiñ khappud lane ka Border Area Tourism bad ruh na bynta ka Rural/Village Tourism.
Shuh shuh, ki la don ruh katto katne ki nongïashimbynta kiba na Jammu, Chattisgarh, West Bengal, Assam, Meghalaya bad Manipur kiba la don ryngkat ha kane ka jingïakop mareh kaba la long hynnin ka Sngi Saitjaiñ.
