Palat 100 tylli ki kor ban song pynitynnad ïa ki mar rep yn buh ka sorkar ban ïarap ïa ki nongrep

Shillong, Nohprah 18 : U Myntri Rangbah ka jylla ha ka sngi Nyngkong u la pynbna ba ka sorkar kan sa mang sa kumba 100 tylli ki Processing Plant na ka bynta ban pynsuk shuh shuh ïa ki nongrep ba kin lah ban pynïaid iew ïa ki mar rep jong ki hadien ba la dep ban pynbit pynbiang.
Ïa kane u la kren ha ka jingrakhe ïa ka sngi kyrpang ki nongrep kaba long ha Resubelpara, North Garo Hills.
“Khnang ba ngin poi sha ka thong, ngi donkam ïa ki nongrep ba kin die ïa ki mar rep kiba la dep pynkhuid bad song bha khnang ba kin kham ïoh nong kham bun. Na ka liang ka sorkar ruh ka buh thong ban kyrshan ïa ki lyngba ki skim kum ka Focus bad Focus+ ban pyntikna ba kan don ka jingkyrshan pisa,” u la ong.
Nalorkata, u ong ruh ba ka sorkar ka kyrshan pisa ruh na ka bynta ban pynneh pynsah ïa ka mei mariang da kaba ïarap pisa ïa ki shnong ki thaw kiba pynneh ïa ki khlaw ki btap.
Ha kajuh ka por u la pyntip ba ki prokram kum ka YESS Meghalaya ki ai ka jingkyrshan kaba kham hakhmat ïa ki samla bad ruh ha kum kane ka por ba kynrei u drok, ka sorkar ka pan ka jingïatrei lang ban btin lynti ïa ki samla ba la bakla lynti.
La donlang ruh ha kane ka sngi naduh u Myntri ka tnad PHE, u Marcuise N Marak, nangta u Deputy Speaker u Timothy D Shira,ki heh sorkar bad kiwei kiwei.
Baroh shisngi ki la don bun bha ki prokram ban pynshai ïa ki nongrep nangta ka jingpyni nam ïa ki jaka rep ba la rim bha ha ka thain, ka jingpyni ïa ki phlim lyngkot halor ka rep ka riang bad kiwei kiwei kynthup halor ka jingtrei borbah ka skim PES bad kiwei kiwei.
Na ka liang u Myntri Rangbah u la sam ruh ïa ki cheque na ka bynta bun ki kam kiba ka sorkar ka plie lad ïa ki nongrep.
La ïathuh ruh ba la sam kumba 7.95lak tyngka ka jingkyrshan pisa sha ki 14 tylli ki Producer Groups lyngba ka FOCUS Scheme, 8.10 lak sha ki 21 tylli ki kynhun jong ki samla lyngba ka YESS, 70 lak tyngka kum ka ram sha ka Farmers Collective lyngba ka Working Capital Loans bad 2.61 klur la phah sha ki 60 ngut ki nongïoh jingmyntoi lyngba ka PES.
Kum ka jingsdang ïa ka jingïaid lynti kaba thymmai na bynta ki nongrep, la plie ruh haduh 17 tylli ki kor ki bor na ka bynta ban pynkhuid bad song bha ïa ki mar rep.