Shillong, Nailar 21 : Ka Malki SC ka la khur ïa ki lai point hadien ba ka la pynliem da 4-2 kol ïa ka Ryntih SC ha ka jingïalehkai jong ka lympung OC Blue Shillong Premier League (SPL) 2021-22 ha ka jingïalehkai kaba la long ha ka sngi Saitjaiñ jong ka taïew ba dang shu dep ha madan Third Ground, Polo, Shillong.
Haba phai sha ka jingïalehkai hapdeng kitei ki ar tylli ki team, ka Malki SC ka la pynlyngngoh ïa kiba bun khamtam ïa ka kynhun ïalehkai pyrshah ha kaba tang hadien ar minit ba la ïaid ka jingïalehkai ka la ïoh ban thep shi kol lyngba u Sanborlang Marweiñ.
Kiba bun ki rangïalehkai jong ka Ryntih SC kiba kham hakhmat ki khlem ïoh ban mih madan ha katei ka jingïalehkai bad don tang 14 ngut namar ki don ha kiwei ki club ïalehkai ka ri, kiba don hapdeng ka jingleit pyrshang (trial) bad don ruh kiba don hapdeng ki jingmynsaw.
Katei ka jingbym don ki rangïalehkai kiba kham hakhmat ka la long ka kabu na bynta ka Malki kaba don ha ka liang ka jingshah pynhiar kyrdan na ka SPL. Ka Malki SC ha ka jingmih madan ha ka sngi Saitjaiñ ka don ha ka kyrdan ba ar na sha trai jong ka miej kheiñ point da kaba kamai 4 point.
Kumta da ka jingïoh thep kloi ïa ka shi kol ka la ai mynsiem ïa ka kyhun ha kaba ki la nang ïakhun tyngeh bad ñion sha ka kut jong ka Ryntih. Hapdeng ka jingïakhun kaba itynnad bha, ka Malki ka la ïoh ban lehkmen biang sa ïa ka shi kol ba la thep da u Kordor Dkhar ha ka minit ba 17.
Watla ka la shah thep ar kol, pynban ki rangïalehkai ka Ryntih ki la ïakhun tyngeh beit triang ban ïoh pynphai ïa kitei ki ar kol. Bad da ka jingïakhun kaba khlem pyndem, u Sheen Sohktung u la ïoh ban thep ïa ka shi kol na bynta ka Ryntih ha ka minit ba 42 jong ka jingïalehkai.
Katei ka jingïoh pynphai shi kol ka la kham pynsyaid ïa ka kynhun baroh kawei bad shwa ban kut ka kylla step u Badonkupar Marbaniang (45’+1) u la ïoh ban thep ïa ka kol pynïakhaid ha ka jingïalehkai jong ka kylla step ka la kut da kaba thep mar ar kol.
Haba wanphai sha ka jingïalehkai jong ka kylla miet, baroh ar kynhun ki la ïakhun tyngeh khlem da ailad bad ïapashat bol ha ka rukom kaba itynnad bha bad pynsmiej thep kol mar kylliang. Ka jingïakhun hapdeng kitei ki ar tylli ki team ha ki minit ba dang sah ka la long kaba ïathnem bha, hynrei dei ha ka minit ba 55 ka la sdang ban pynkylla biang ïa ka jingïalehkai hadien ba u Kyrpadlang Tariang u la thep ïa ka kol kaba lai na bynta ka Malki kaba la tam da 3-2.
Lyngba katei jingïoh thep lai kol, ka Malki ka la pynskhem bha ïa la ka jong ka kut khlem da ailad ïa ka Ryntih kaba la ñion naphang ban pynphai kol hynrei ha baroh ki 90 minit ka khlem lah shuh ban pynphai kol bad ka Malki khlem da hun tang kitei ki lai kol ha kaba ka la ïoh ban thep khatduh ïa ka shi kol lyngba u Sanborlang Marweiñ ha ka minit 90+4 bad khur syndon ïa ka jingjop.
Kum ban pynkynmaw hangne ba ka Ryntih SC ka la pynliem ïa ka Malki SC da 3-0 ha ka jingïakhun ba lah dep. Da katei ka nam jop ka Malki SC mynta ka kamai 7 point bad bud nadien ka Nangkiew Irat SC kaba don ha ka kyrdan ba hynriew da kaba kamai 10 point.
Mynta ka sngi ka jingïalehkai kan long hapdeng ka Shillong Lajong FC (11 point) pyrshah ïa ka Mawlai SC (23). Ha ka jingïalehkai ba lah dep ka Mawlai SC ka la pynliem ïa ka Shillong Lajong FC da 1-0.
