Shillong, Nailar 21 : Ka Upper Shillong Boxing Association (USBA) ha ka sngi Saitjaiñ jong ka taïew ba dang shu dep ka la plie ïa ka jaka ai jinghikai Boxing na ka bynta ki khynnah shynrang bad kynthei ka thaiñ Upper Shillong kaba don ha Nongkseh, Upper Shillong.
Ïa ka ïing ai jinghikai la plie da u MLA ka Mylliem uba long u myntri sorkar Bah Hamletson Dohling kum u kongsan ha ryngkat ka jingïadonlang i trai jaka iba la noh synñiang ïa ka jaka ban tei ïa katei i Kong Moralin Thangkhiew kum ka symbud kongsan, u rangbah shnong, ki dkhot bad nongïalam ka USBA nalor kiwei pat.
Haba kren kum u kongsan u Bah Hamletson u la ai jingïaroh ïa i Kong Moralin bad ka ïing ka sem jong i kiba la kloi ban ai ïa ka jaka na ka bynta katei ka jingthmu ym tang katta hynrei ruh ban ïarap ban pynshna ïa ka ïing namar u ong ba i don ka mynsiem ban kyntiew ïa ki khynnah bad samla ka thaiñ bad kumjuh khnang ba kin lait na ki jingmlien ba sniew.
U la ai ia jingïaroh ruh ïa ka USBA kaba la pynmih ki nongïakura kiba bun kiba la wanrah nam ïa ka thaiñ ha ka kam ïakura ha ki rynsan ïakop kura la ka dei ha ka jylla ne wat shabar jylla ruh kumjuh.
Shuh shuh u ong ba naduh ba u la jop kum u MLA bad kum u briew uba ieid ïa ka sport bad ïa ki samla u la trei shitom ban wad ki lynti na ka bynta ban kyntiew ïa ki khynnah bad samla ha ki kam ïalehkai namar u ong ba katba ki khynnah ki dang ieid ïa ki jingïalehkai ki lait na ki jingsniew kiba bun.
U ïathuh ruh ba dang shen ka sorkar ka la pyllait ïa ka skhim ba la tip kum ka Yes Meghalaya ha kaba ki kynhun jong ki samla ki lah ban ïoh ka jingïarap kaba haduh 1 lak tyngka.
Ha Kane ka sngi la pynkup burom ruh ïa ki nongïakura kiba la ïoh ki khusnam bapher bapher ha ki rynsan ïakura la ka long ha la ka jylla ne shabar bad kumjuh na ka liang u kongsan u la noh synñiang 1 lak tyngka sha ka USBA.
