Jowai, Nailar 21 : Ka kynhun ïalehkai jong ka Mookyndur kala long ka lahduh ha ka jingïakhun phainal ha kane ka sngi saitjaiñ ha ka lympung ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) ha madan Kiang Nangbah Stadium Jowai.
Ïa kane ka nam jop jong ka Mookyndur SC kala wan hadien ba kala lah ban pynliem da 1-0 kol ïa ka Khliehïongriang SC ha ka jingïakhun phainal kaba itynnad bha hapdeng kine ki ar kynhun naduh kaba sdang tat haduh ban da kut ka jingïakhun kaba la pynhun shisha ïa ki nongwan peitkai bad ki nongkyrshan na baroh ar liang.
Dei ha ka jingïakhun jong ka kylla step hi ba ka Mookyndur kala ïoh ban theh ïa katei ka shikol dang ha ka minit ba 4 lyngba u rangïalehkai jong ka u Nehlang Phawa uba phong ïa ka Jersey ba 17, hadien jong kane ka shikol ka Khlieïongriang kala ïaleh katba lah ban pynphai ïa katei ka shikol hynrei haduh ba kut jong ka kylla step kala neh da 1-0 kol.
Haba wan ban bteng ïa ka jingïakhun jong ka kylla miet la sakhi ba ka Khliehïongriang kala ïalehkai bha namar ka bol kala kham noh beit sha ka liang jong ka Mookyndur, katba ka Khliehïongriang ka dang pyrshang ban pynphai ïa katei ka kol hynrei ka por jong ka jingïakhun kala kut noh.
Ïa ki khusnam sha ki nongjop la sam da u kongsan jong kane ka sngi uba dei ruh u Myntri ka sorkar jylla u bah Sanbor Shullai uba peit ruh ïa ka tnad Arts and Culture ha ryngkat ka jingdonlang u District Sports Officer (DSO) ma K. Passah, ki nongïalam bad ki dkhot ka West Jaiñtia District Sports Association, kiba haïing u (late) Debo Shullai nalor kiwei de.
Ïa ka nam Best Goalkeeper la ïoh rah da u Rimi Dkhar na ka Khliehïongriang SC, ka nam Top Scorer la ïoh ar ngut kata u Jomsing Pariat na ka Mookyndur bad u Ebanskhem Nongtdeh na ka Iawmulong Nartiang, ka nam Man of the Match la ïoh da u Nehlang Phawa na ka Mookyndur SC bad ïa ka nam Player of the Tournament la ïoh rah da u Promi Suting na ka Mookyndur SC.
Katba ka kynhun lahduh jong kane ka lympung ka Mookyndur SC kala ïoh rong ïa ka khusnam da ka Trophy ha ryngkat ka song pisa ba 24,000/- tyngkat bad ka kynhun ba wan ba ar ka Khliehïongriang SC kala ïoh rong ïa ka Trophy bad ka pisa ba 12,000/- tyngka.
