Noh synñiang u Dy.CM, CEM bad MLA 45 lak ban sdang ïa ka Science Stream ha St. Paul HSS
Shillong, Nohprah 17: Ka St Paul Higher Secondary School, Marbisu ha ka sngi Thohdieng, ka la pynlong ïa ka Annual Get Together jong ki khynnah skul kiba rim bad kiba mynta bad ha kajuh ka por ban pynkhreh ïa ka jingrakhe jingdap 75 snem jong kane ka skul. Ha kane ka sngi na ka liang u Kongsan uba dei u Symbud Myntri Rangbah u bah Prestone Tynsong u la noh synñiang na ka liang ka sorkar sha ka skul 20 lak tyngka khnang ba kin ïoh ban sdang noh ïa ka science stream. Kiwei kiba la noh synñiang ki long u Symbud Kongsan uba dei u CEM ka KHADC u bah Pyniaid Sing Syiem bad na ka liang jongu u kular ba ka KHADC kan synñiang 20 lak tyngka. Sa u MLA katei ka thaiñ ruh u la noh synniang 5 lak tyngka.
ïa kane ka jingrakhe la plie da u Symbud Myntri Rangbah ka jylla u Bah Prestone Tynsong kum u kongsan ha kaba la ïa don lang u Chief Executive Member ka KHADC u Bah Pyniaid Sing Syiem, u MLA ka Mawphlang u Bah MB Kurbah, u Chairman ka KHADC u Bah Lamphrang Blah, u Principal ka St Paul u Fr Jemeris Shylla, ki khynnah skul kiba rim bad kiba mynta bad kiwei kiwei.
U Bah Prestone Tynsong haba ai jingkren ula ong ba kane ka skul St Paul Marbisu ka la ïaryngkat kyrdan bad ki skul kiba don ha ka nongbah Shillong bad ïa kane la sakhi lyngba ka jingwan shakhmat kawei ka khynnah na kane ka skul ha ka eksam Matrik kaba la dep.
Ula kyntu ïa ki khynnah skul ba ki dei ban minot thop bad ban trei shitom ban wan shakhmat ha ka jingpule ka jongki bad ula kyntu ruh ïa ki kmie ki kpa ba ki dei ban don lang ïa ka jingkitkhlieh ha ka ban pynnang pynstad ïa la ki khun khamtam haba ka jingnang jingstad ka long kaba kordor bha ha kane ka juk kaba mynta.
Ha kaba ïadei bad ka jingai dorkhas ki bor pynïaid jong ka skul na ka bynta ban sdang ïa ka Science Stream na ka bynta ka klas XI bad XII, u Bah Prestone ula pynbna ba ka sorkar jylla kan ai jingkyrshan da kaba ïarap T.20 Lak ïa ka Skul ban sdang ïa ka Science Stream khnang ba kan long ka jingmyntoi ïa ki khynnah pule kane ka thaiñ baroh kawei.
Na ka liang u CEM ka KHADC ula pynbna ban noh synñiang T.20 Lak tyngka katba u MLA ka Mawphlang ula pynbna ban ai 5 lak tyngka.
Ka jingthmu jong kane ka prokram ka long ban lum bad ban pynïakynduh lang ïa baroh ki khynnah skul kiba rim bad kiba dang pule mynta ba kin ïathuh iwei ïa iwei bad kum shi bynta ban pynkhreh ban rakhe ïa ka jingdap 75 snem jongka skul.