Noh synñiang ka kynhun ïa ar tylli ki longïing pluh ïing ha Sangriang

0

Sangriang, K’lyngkot 15 : Kum ka jingkner ki kti jingïarap ia artylli ki longïing pluh ding ha ka shnong Sangriang ha ka thaiñ Nongkhnum, West Khasi Hills District kaba dei ka ïing i kong Bisida Marshra bad Bah Roshem Marthong kiba la mad ia ka jingduh noh ka ïing ka sem bad baroh ki jingdon jingem kaba la jia ha ka 27 tarik u Nohprah, 2024 bad ka jong i kong Pershadlin Marshra bad bah Kynshaijune Iawren kaba la pluh ha ka 9 tarik u Kyllalyngkot, 2025.
Namarkata, ka kynhun Whatsapp, “Ïarap ïa ki – ha ka khyllipmat ba ki donkam eh”, ha kine ki khyndiat sngi ka la leit sha kitei ki longïing ban noh synñiang lyngba u synñiang ki paidbah na kylleng sawdong.
Ha kane ka sngi la ïa don ryngkat u bah Over Sangriang Myntri ka shnong Sangriang, kiba ha ïing ha sem kine ki longïing bad katto katne ngut ki dkhot ka kynhun na Shillong, Upper Shillong, Mawngap, Nongstoiñ bad na kiwei ki jaka ba la ialam da u bah Staising Kharbteng uba long u Nongsaiñdur kane ka kynhun.
Na ka liang jong ka kynhun ka pynpaw ba dei lyngba ka jingpynpaw paidbah ki kynhun kiba leit ïarap ïa katei ka longïing ha ki pathai khubor ba ki ïoh jingtip ïa kine ki jingjia bad pynlong ïa ki ban poi sha kane ki longïing ha kane ka sngi da kaba ai khublei ïa baroh ki paidbah kiba la kyrshan ïa ka kynhun kiba kynthup ïa ki dkhot bad ki bym dei ki dkhot kane ka kynhun kiba la noh synñiang sbun bad kylluid mynsiem.
U Bah Over Myntri ka shnong u la ai khublei ïa kane ka kynhun bad pynpaw ka jingsngewnguh ïa ka jingmih jong ki shakhmat ban ïa-kit ïa-bah ban wan noh synñiang ïa kine ki longïing kiba mad ïa kine ki jingjia ban duh ïa ka ïing ka sem bad baroh ki jingdon jingem.
U Bah Roshem Marthong uba dei uwei na ki longïing ba mad ïa kane ka jingduh noh ka ïing bad ki jingdon jingem u la pynpaw ba dei lyngba kane ka jingjia ka pynkyndit bynriew ïa i ban sngewthuh ïa ka jingkordor ban don ka mynsiem sngewlem ban ïarap ïa kiwei ha kum kine ki jingjia bad pynpaw ka jingsngewnguh ïa baroh kiba la wan ban noh synñiang ïa ki ha kum kane ka jingkthang mynsiem ba ki mad.

Leave A Reply

Your email address will not be published.