Jurip u Principal Secretary ka C&RD ïa ka Mawshynrut

0

Nongstoiñ, K’lyngkot 15: U Sampath Kumar IAS, Principal Secretary ka tnad Pynroi Nongkyndong (C&RD) mynta ka sngi u la wan jngoh bad jurip ïa ka Mawshynrut Block West Khasi Hills District, ban bishar bniah ïa ki prokram pynroi ha ki nongkyndong lyngba ka tnad C&RD.
La synran lang ïa u Sampat Kumar da u Bah Garod L.S.N Dykes, IAS, Deputy Commissioner, u Bah V.C Swer, MCS (ADC), u Bah R.Kharkongor MCS, BDO ka Mawshynrut Block, ka Kong I. Diengdoh Project Mission Director ka SRES bad kiwei kiwei ki heh sorkar, ha kaba ki nongshong shnong na ki shnong kiba pher kiba hap hapoh ka Mawshynrut Block ki la pdiang sngewbha ïa u.
Ha ka jinghiar iukjat jong u, u la jurip ïa ki projek MGNREGS kiba dang ïaid shakhmat, nangta u la plie ïa ka ïing PMAY-G ba la shna thymmai ha Nongryngkew-A, bad bishar ïa ka jingïaid bad jingktah jong ki skhim.
U la ïoh ruh ban ïa phylliew jingmut bad ïakren bad ki nongtrei jong ka Village Employment Council (VEC), ki nong bat Job Card, ki dkhot jong ka Cluster Level Federation (CLF), ki SHG, ki nongtrei ASHA, ki nongtrei Anganwadi, da kaba pynbeit ïa ki jingeh jong ki bad lum jingmut ban pynbha ïa ka jingpynpoi ïa ki skhim sorkar hapoh ki dong ki shnong jong ki.
Ha ka jingïalang ha Christ King Hall, Banglapluh, u Sampath Kumar, u la ïaroh ïa ka jingpyntreikam kaba khuid ba suba ïa ki skhim pdeng da ki VEC bad ki Seng Shnong (VO) jong ka Nongryngkew A, namar ka jingpyntreikam hok jong ki ïa ki skhim sorkar pdeng ka shnong Nongryngkew A, ka la lah ban shna ïa shibun tylli ki surok la kidei ki surok ïaid kjat ne kali kaba la pynsuk ïa ki nongshong shnong kong katei ka shnong, kumjuh ruh ka jingpyntrei hok ïa ka skhim PMAY ha kaba haduh 35 tylli ki longïing ki la ïoh ïa kane ka skhim shna ïing bad 21 tylli ki la dep pura.
U la kyntu ïa kiwei pat ki nongshong shnong jong ka Mawshynrut block ba wat lada kam long kaba suk ban pyntyllun ïa ki kam, khamtam eh ha kaba ïadei bad u Addhar card. U la kyntu ïa ki VEC ki VO ba kim dei ban randien hynrei ban nang ïai trei shitom, khnang ba skhim sorkar pdeng kin nang tyllun ha ki shong ki thaw jong ki.
Kane ka jingleit jngoh ka dei ka jingangnud jong ka tnad C&RD na ka bynta ka roi ka par hapoh ki nongkyndong, khnang ba ki nongshong shnong kin ym mad jingeh la ka dei ha ki kynti ki syngkien ne ha ka ïoh ka kot jong ki.

Leave A Reply

Your email address will not be published.