Shillong, Naitung, 14: Da ki phew ngut ki dkhot bad ki nongïalam jong ka Hynñiewtrep Youths Council (HYC) ha ka sngi Thohdieng ki la tur kyndit sha ophis Main Secretariat ban pynrem ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ka bym shym la lah satia ban pynïoh ïa ka jingdawa Inner Line Permit (ILP), ban pynrung ïa ka Ktien Khasi ha ka Khyrnit Baphra.
Haba pynrem jur ïa ka jingpynbna u Myntri Rangbah ka Jylla u Conrad Kongkal Sangma ba ka Sorkar ka la phaikmat mynta ban pynpoi ïa ka lynti Rel ha Khliehriat, East Jaiñtia Hills District, ki dkhot ka seng ki la pyrta shla da ka sur kaba jam, “No ILP, No Railway.”
Ka seng ka la buh jingkylli ruh ïa ka Sorkar halor ka jingpynslem ban pynrung ïa ka ktien Khasi ha ka Khyrnit Baphra jong ka riti synshar ka ri India bad ha kajuh ka por ki dkhot ka seng ki la pynrem jur ïa u MP ka Shillong u Bah Vincent H. Pala halor ka jingai jingkyrshan ban pynpoi ïa ka lynti Rel ha Khliehriat, East Jaiñtia Hills District.
Ki bor Pulit hapoh ka jingïalam jong u Superintendent of Police (City) bad u Additional District Magistrate u Bah Ronnie Wahlang tang shu ïoh jingtip ïa kane ka jingtur kyndit jong ki dkhot ka HYC sha Secretariat ki la leit mar mar ban pynsngewthuh ïa ki nongïalam ba kin ym ïalum paidbah hakhmat ka khyrdop jong kane ka ophis treikam bakongsan jong ka Sorkar khnang ba kan ym pynthud ïa ka leit ka wan jong ki kali kiba ïaid lyngba nakhmat ka surok jong ka Main Secretariat.
Ki dkhot ka HYC ki bym shym pynsngap ïa ka jingkyrpad jong ki bor synshar District, ki la shong kyllaiñ myngngor syndon hakhmat ka khyrdop jong ka Main Secretariat.
Ha kane ka por, katba ka kali kaba kit ïa u Symbud Myntri Rangbah ka Jylla uba peit ïa ka tnat Kam Pohïing u Bah Prestone Tynsong ka dang thmu ban rung sha Secretariat, ki dkhot ka seng ki la pyrta shla, “No ILP, No Rest”.
Ki dkhot ka seng kim shym la khih satia na kane ka jaka bad ki la rah da ki plakad ban bteng ka jingpyrta ïa ki sur pynrem ïa ka Sorkar MDA tad haduh ba u Symbud Myntri Rangbah Bah Prestone Tynsong un da khot ïakren.
Ha ka jingïakren bad ki lad pathai khubor hadien ka jingïakynduh ïa u Symbud Myntri Rangbah Bah Prestone Tynsong, u General Secretary ka HYC u Bah Roy Kupar Synrem, u la ong, “ngi la kren da kaba shai ba khlem ka ILP ym dei ban wanrah ïa ka lynti Rel. Ngin ym shah ban ai jingbit ban shna ïa ka lynti Rel ha rilum Khasi bad Jaiñtia khlem da don ki aiñ kiba ïada shwa ïa ngi ki ritpaid na ka jingshah tyllep ha ki mynder kiba nabar ka jylla.”
“Ha kaba ïadei bad kane, u (Bah Tynsong) u la kren shai ba ka sorkar kam pat don jingthmu ban wanrah ïa ka lynti Rel hapoh rilum Khasi bad Jaiñtia ïa mynta bad kam pat don satia ka jingïakren hapoh ka Kynhun Myntri,” la ïathuh u Bah Synrem.
“Ngi la ïakren ruh halor ki mat ba sahteng kum ka ILP, ka jingithuh ïa ka ktien Khasi bad ka MRSSA (Amendment) Bill, 2020 ha kaba u Symbud Myntri Rangbah u la pyntip ba ka Sorkar ka dang budien ïa kane ka kam. Ka Sorkar hapoh ka jingïalam jong u Myntri Rangbah kan sa leit da ka Kynhun Myntri sha Delhi ban ïakynduh ïa u Myntri Rangbahduh ka ri bad ïa u Myntri ka tnat Kam Pohing bad ïa kiwei kiwei ki Myntri ka Sorkar Pdeng ban buddien ïa ki mat kiba sahteng,” la ïathuh shuh shuh u Bah Synrem.
Halor kane ka jingpyntip jong u Symbud Myntri Rangbah, ka HYC ka la rai ban ap tad haduh ba ka Kynhun Myntri kan da leit bad kan da wan phai na Delhi shwa ban shim ïa kano kano ka rai.
