Ngin ai jingthoh sha ka Sorkar halor ka jingkiew dor, da kam leh ei ei, ngin ïakhih biang: VPP

Shillong, Nailur, 13: Ka VPP ka la rai ban ai da ka jingthoh sha ka sorkar ha kaba ïadei bad ka jingkiew dor ki marbam mardih bad lada kam leh ei ei ka Seng kan pynlong biang da ka jingïakhih.
Ïa kane la ïathuh da u Bah Ardent Miller Basaïawmoit, President ka Seng haba kren ha ka jingïalang shuwa ban pynkut ïa ka jingïakhih ba shi sngi lyngba ka Sit in Demonstration kaba la long mynta ka sngi ha Madan Malki.
U Bah Ardent u la ong ruh ba ka Seng kam shym la ïakhih khlem ka nongrim halor kane ka bynta, hynrei ka la da lum jingtip na kiwei pat ki jylla ha kaba ïadei bad ka dor ka mur jong ki marbam ha Assam bad Nagaland bad la shem ba ka dor ka tam shibun shah bad hangne.
“Nga tip kin don kiba ai daw ba dei na ka jingbym don lynti rel ba sa kiew ka dor marbam”, u la ong, da kaba bynrap ba jin lada ka sorkar ka ïoh lad ban pynshai bad ba u Speaker u ailad ban ïakren ha Assembly la ïoh ban ïakren ïa kiba bun ki daw. U la ong ba ki daw ba kongsan kadei ruh ka jingdon ki khyrdop lum khajna, ka jingkhrong pisa ki Pulit bad kiwei kiwei.
U la ong ruh ba ka jingshu khñium ki paidbah tang ha ïing halor ka jingkiew dor ka dei ka daw ba ka sorkar kam patiaw, wat lada ka dor ba buh ka sorkar bad kaba die ha iew ka ïapher sha bneng sha khyndew.
Ha kane ka jingïakhih la ïashim bynta lang da u MP ka Shillong, u Dr. Ricky Syngkon, ki MLA, ki nongkitkam ka VPP bad ki riewpaidbah.