Shillong, Naitung, 22: Ki samla pule jong ka skulbah North Eastern Hills University (NEHU) hapoh ka shatri jong ka NEHU Student Union (NEHUSU) ha ka sngi Saitjaiñ ki la pynpaw ka jingsngewdiaw bad ka jingpyrshah halor ka jingshim rai kyrkieh da u Vice Chancellor (VC) u Prof. P.S Shukla ban pyntreikam ïa ka National Education Policy (NEP) 2020 naduh 1 tarik Nailar 2023.
Kane ka jingpyrshah jong ki samla pule, ka long hadien shi sngi ba ki nonghikai College kiba don hapoh ka shatri jong ka Meghalaya College Teachers Association (MCTA) ki la pynpaw ka jingpyrshah ïa ka jingshim rai jong ka skulbah North Eastern Hills University (NEHU) ban pyntreikam noh mardor ïa ka National Education Policy (NEP 2020.
Ha ka jingïakren bad ki lad pathai khubor u Finance Sectary jong ka NEHUSU u samla Mandor Diengdoh Swer ula ong, “ki don shibun ki mat ha ka NEP 2020 kiba sngewtynnad bad kiba shongnia ban kyntiew bad ban wanrah jingkylla ïa ka pule puthi ha baroh kawei ka ri India bad ha Meghalaya. Ngim pyrshah ïa ka NEP hynrei ngi sngew ba kane ka rai jong u Vice Chancellor ban pyntreikam naduh 1 tarik Nailar ha baroh ki College kiba hap hapoh ka jingkhmih ka NEHU ka long kaba shu leh kyrkieh shaba palat namarba ki dang don shibun ki kam ba donkam ban leh na ka bynta ban pynthikna ba ka jingpyntreikam bha ïa ka NEP ha Meghalaya ka long kaba ïaid beit ïaid ryntih.”
U samla Mandor ula ong ba la donkam sa kumba shi snem eiei ban pynkheh ïa ki jingdonkam na ka bynta ban pynthikna ba ka jingpyntreikam ïa ka NEP ha Meghalaya kan long kaba seisoh bad kaba ïaid beit ïaid ryntih.
U la kam ba ki dang shibun ki College bad ki jaka Pule ha kylleng ka Meghalaya kiba dang duna ki nonghikai kiba tbit ïa ki Sobjek bad ki don ruh ki College ha sor bad khap sor ki bym don lut ki tnat Pule.
U Vice President jong ka NEHUSU u samla Easterson Sohtun ula ong ba kane ka jingrai kyrkieh da u VC ban pyntreikam noh ïa ka NEP naduh 1 tarik Nailar 2023 ka paw hi ba u Vice Chancellor ul a shim rai marwei khlem da kheiñ snep ïa ka rai jong ka Academic Council jong ka NEHU.
U samla Easterson ula ong ba wat na ka liang jong u Myntri ka tnat Pule Puthi u Rakkam Sangma dang shen ula kren shai ba ki don ki College ha Meghalaya ki bym pat kotbor ban pyntreikam ïa ka NEP mynta u snem 2023 bad dei namar kane ki nonghikai bad ki samla pule ki sngewdiaw bha halor kane ka jingrai kyrkieh u Vice Chancellor ban pyntreikam noh naduh 1 tarik Nailar ïa ka NEP ha Meghalaya.
