Ngi donkam ban ïatreilang ka sorkar bad ki bor pynïaid shnong halor ki jingeh ba mih ha sor : Conrad

Shillong, Risaw 31: U Myntri Rangbah ka jylla u Conrad K Sangma ha ka sngi Thohdieng ula ban jur ïa ka jingdonkam ban ïatreilang hapdeng ka sorkar bad ki bor shnong ban shimkhia ïa ki jingeh kiba mad ha ki jaka sor bad khapsor.
U la ong, “Ka jingthmu jong kane ka jingïalang kam dei tang ban shu kdew ïa kiei ki bym shim la treikam, hynrei ban kylli ïa kaei kaba ngi lah ban ïatreilang ban pynlong ïa kaba bha tam. Haba ka shnong ka thaw, ka sorkar, ki ophisar bad ki nongïalam seng saiñ pyrthei ki ïa wanlang hajuh, kan ym don kaei kaei ruh kaba yn ym lah ban pynurlong,” ula ong haba kren ha ka jingïalang ïasyllok bad ki Rangbah Shnong bad ki nongïalam ha ki shnong kiba hap hapoh jong ka Greater Shillong Planning Area kaba la long ha ka sngi Thohdieng ha State Convention Centre.
Ha kane ka jingïalang la plie ruh ïa ka jingsdang ïa ka Mission Clean Shillong 2027 kaba dei ka sienjam da ka jingthmu ban pynlong ïa ka Shillong kum kawei na ki jaka kaba khuid bad ka nongbah kaba pynneh pynsah ha ka thaiñ shatei lammihngi lyngba ka jingpynbha ïa ka rukom lum ïa ki ñiut, ka jingïashimbynta lang ki shnong ki thaw bad ka jingïatrei ryngkatlang hapdeng ki bor shnong bad ki khlieh nongsynshar.
Ka mission ka pynleit jingmut ban pynlong ïa ki shnong kiba khuid ban kynjoh ïa ka 100 percent ka Waste Processing, ban weng ïa ki ñiut kiba la sahteng hapoh ka jaka lum ñiut ha Marten bad ban sdang pyntreikam ïa ka jingkhmih bniah da ka jingpyndonkam ïa ki kor ki bor. Kan kyntiew ruh ïa ki nongshong shnong ban ïalam ïa ki jingpynkhuid ia ki shnong bad ka jingdon ïa ka jingkitkhlieh ha ka ban ïashimbynta ha ka ban pynkhlaiñ ïa ka khuid ka suba.
U Myntri Rangbah u la ong ba ka jingïakynduh lang kaba man la ka por bad ki nongïalam shnong ka pyni ïa ka jingthmu jong ka sorkar ban don ïa ka jingïatreilang bad ki sienjam kiban shim ki ban long na ka bynta ka shnong ka thaw.
U la ong, “Ngim lah ban long kiba biang pura lut hynrei ngi la pyrshang tyngeh pat. Namar ka jingtuklar lem ka jong phi, kiba bun kiei kiei kila sdang ban bha, naduh na ka jingdon ïa ki jaka pynbiang ïa ka umbam umdih, ki jaka bret ñiut, ka jingpynbiang ïa ka bording elektrik bad ka rukom lum ïa ki ñiut ki ñier, hynrei ki dang bun pat kiei kiei kiba hap ban dang leh shuh shuh.”
U Myntri Rangbah halor kane ula pynshai ruh ïa ki sienjam kiba la shim da ka sorkar, kaba kynthup ïa ka jingpyndait ïa ki CCTV, ka jingbuh ïa ki street light bad post elektrik, ka jingpynkhuid ïa ki nala bad ka jingpynitynnad ïa ka nongbah. Ula kyntu ban don ïa ka rukom treikam bad ka jingpynitynnad bad ka jingsumar sukher kan long ka kam kaba leh man la ka por bad kan ym dei shuh kaba shu leh tang shisien. U la pyntip shuh shuh ba ka jingïakren yn sa pynlong biang halor ki ar tylli ki mat kiba kongsan kaba kynthup ïa ka jingpynkhuid ïa ki wah bad ban ïakhun pyrshah ïa u drok ban pynthikna ba dei ban mih ka jingseisoh ha ki bnai ban wan.
U la ong, “To ngin ïa bteng ban ïatrei kum ka kynhun ban pynlong ïa ka Shillong kaba khuid, jyrngam bad ka nongbah kaba khie im bha.”
Ha kane ka jingïalang, ki heh ophisar na ka tnat Urban Affairs ki la pynlong ïa baroh ki kam ba la leh hapoh jong ka Clean Shillong Mission, kaba la sdang ha u Naitung 2025. Ka tnat ka la pyntip ba ka la don ka jingkiew da 50 percent ha ka jingdon ki nongtrei ha ka khuid ka suba, ka jinglong ryntih ha ka jingpynkhuid ïa ki nala bad ka jingtreikam bha ha ka rukom lum ïa ki ñiut ki ñier. La jan kumba shiteng na ka 3.5 lak metric ton u ñiut uba la don ha Marten la dep ban tylliat lyngba ka bio-mining bad la pyndonkam ruh ïa ki ñiut ki ñier kum ki sboh thung jingthung lyngba ka jingïatreilang bad ka tnat ka rep ka riang.
Ha ka jingïalang ki ophisar ki la batai ruh shaphang ka jingïaid shakhmat ki kam ban pynkhie im ïa ki wah, ki jaka ïeng kali kiba thymmai, ka projek pynkynriah ïa ki nongdie madan bad ki jaka pynïeng ryntih ïa ki kali ha kylleng ki shnong ki thaw.
Ha kane ka sngi la pyllait ïa ka pisa sha ki 14 tylli ki shnong ban kyntiew ïa ki projek kiba ïadei bad ka jingpynitynnad bad pynbha briew bad ka jingïashim bynta ki nongshong shnong.
U Myntri Rangbah ula sam ruh ïa ki cheque sha kitei ki 14 tylli ki shnong bad pynshlur ïa ki ban shim ïa ki sienjam kum ka jingdro ïa ki dur ha ki kynroh bad ka jingairong ai rup ban pynitynnad shuh shuh ïa ka nongbah Shillong.
Ha kane ka sngi ka la don ruh ka jingïakren hapdeng u Myntri Rangbah bad ki Rangbah Shnong kaba la long kum ka rynsan ban ïasyllok ha kaba ïadei bad ki jingtei, ka jingkhuid jingsuba, ka jingshngaiñ bad ka rukom synshar khaddar ha ki jaka sor bad khapsor.
U Myntri Rangbah u la pynbna ba ha ka wat kaba nyngkong jong ka jingpyndait ïa ki CCTV kan kynthup ïa ki 48 tylli ki shnong ha kaba yn pyndait 250 tylli ki camera bad ïa kane yn pyndep hapoh ka taïew ba kut jong u Naiwieng. Ka Shillong Municipal Board kan long kum ka kynhun ka ban khmih bad sumar ïa ki CCTV bad ïa ki Street Light bad yn pyntyllun shakhmat ïa ki prokram ban buh ïa ki Street Light ban kyntiew ïa ka jingkynthup ha kylleng ki lad bad ki shnong ki thaw.
Ula bthah ruh ban don ïa ka jingryntih ha ka jingpynkhuid ïa ki nala khnang ban lait na ka jingshlei um bad ban kyntiew ïa ka khuid ka suba ha kaba kine ki jingpyrshang kin ïaid ryngkat bad ka jingpynkhreh ïa ka National Games 2027. Ki jaka kiba jur ki kam sniew yn buh hakhmat eh ban kyntiew ha ki liang ki bapher bapher kaba kynthup ïa ka jingbuh ïa ki post elektrik, CCTV bad ki lynti ïaid kjat bad kiwei kiwei.
Ha kane ka sngi kiwei pat ki mat kiba la ïakren kadei halor ka jingpynïar ïa ki Village Defense Party (VDP) ki prokram kiba ïadei bad ki Volunteer ban pynkhlaiñ ïa ka jingpahara ha ki shnong ban ïakhun ïa ka jingkynrei u drok, ban pynïaid ïa ki kali ban pynduna ïa ka jingkhapngiah bad ki projek pynitynnad ki ban dang wan. Ka jingpynbiang ïa ki paiñkhana na ka bynta ki paidbah bad ka jingïatreilang lyngba ka projek jong ka CSR kan dei kaba la buh hakhmat ha ki jaka khaïi pateng kiba kongsan bha.
Ha ka jingïalang la wan ïashimbynta lang u Symbud Myntri Rangbah ka jylla u Bah Sniawbhalang Dhar, u Chief Secretary u Dr. Shakil Ahammed, u Commissioner and Secretary Dr Vijay Kumar D ryngkat bad ki heh ophisar na ka tnad Urban Affairs, Shillong Municipal Board (SMB) bad ka Meghalaya Urban Development Authority (MUDA).