Shillong, Lber 29: “Kane ka Sngi Thohdieng Bakhuid ne ka Good Friday ka pynkynmaw ïa ngi ba ngi donkam ïa U Nongsiewspah u ban pynim ïa ngi namar ba ngi dei ki nongpop,” ong u Parish Priest ka Mary’s Help of Christian ka Cathedral Parish ha Laitumkhrah u Rev. Fr Bernard Laloo ha ka lehniam Sngi Thohdieng Bakhuid.
Haba sneng bad kraw ïa ki para bangeit u la ong ba donkam ban pdiang ïa ka diengphna jong ka jingkylla bamut bad donkam ruh ban puson ha kane ka Sngi ba kyntang bad ka Sngi ba shah sah Narphna u Trai Jisu Khrist bad ong ruh ba u Jisu Khrist u la ïap khlem leh pop u la shah shitom na ka bynta ki briew.
“Dei na kane ka daw ba ngi donkam ïa ka diengphna bad ïa u Nongsiewspah u ba la shah sah Narphna na ka bynta jong ngi namar ngi dei ki nongpop bad ngi donkam ïa u nongpynim ban siew spah ïa ngi,” u la ong.
U la ong ba ka niam Khristan khlem ka diengphna ka long ka niam kaba khlem Nongsiewspah kan shu long tang ka kynhun khlem Nongsiewspah.
“U Jisu hi u lah ong ba jar kiba kwah ban long synran u hap shim bad kit ïa ka diengphna bad bud nadien jong u, ka diengphna ha shwa ka jingshah ïap u Jisu ka lah dei ka jingtieng bad jingma bad baroh ma ngi ngin hap Bah ïa ka diengphna bad ka diengphna kaba kumno pat ngin hap ïa bah,” buh jingkylli u Lyngdoh Sohblei ïa kiba ngeit ha ka jinglehniam.
U la ong ba ka jingthmu jong ka jingsah Narphna la leh ïa kito kiba ïaleh pyrshah ne kiba pynkheiñ ïa ki kyndon, hynrei ïa u Jisu pat la kynnoh ba u la leh pyrshah.
“Kumta ngi donkam ban jied ïa ka diengphna jong ka jingkylla kaba mut ban phai sha U Jisu bad ban leh ïa ki kam ba bha ban duwai bad ban leh ïa ki kam kylla na kaba sniew sha ka babha,” u la ong.
