Shillong, K’lyngkot, 23: Ka Pradesh Election Committee, Meghalaya jong ka Seng Congress ha ka sngi Baar ka la shong jingïalang ïathir ïatai bad ban ïathew ïawoh hadien ba ka la ïoh pdiang ïa ki kyrteng jong ki nongpan tiket na ka bynta ban ïakhun ïa ka elekshon Lok Sabha na Shilong bad Tura Seat ka ban sa long mynta u snem.
U nongïalam jong ka Congress Legislature Party (CLP) Bah Ronnie V. Lyngdoh u la kyntait ban ïathuh ïa ki kyrtengjong ki nongpan tiket bad ong ruh ba ka kam por kam long satia ban pynpaw pyrthei ïa ki nongpan tiket hynrei yn sa pynbna paidbah ïa ki kyrtong shwa ka taiew bakhatduh mynta u bnai ynda la ïoh ïa ka jingmynjur na ka All India Congress Committee (AICC).
Haba kylli, haduh katno ka Congress ka kam nongkynti ban jop biang ïa ka elekshon Lok Sabha na Shillong khamtam eh hadien ba ka la jop tang san Seat ha ka elekshon Assembly, u President ka Meghalaya Pradesh Congress Committee (MPCC) Bah Vincent H. Pala u la ong, “haoid, ka long kaba jwat bha ïa ka Congress mynta ka kynti hadien ka jingmih noh jong ki nongïalam bad ki nongtrei ka party ha u snem baladep hynrei watla katta kat shaba ngi leit ngi ïoh ïa ka jingieid jong u paidbah ha manla ki jingïalang kiba ngi la pynlong.”
“Ngi la tynrong kam ha ki MLA, ki MDC bad ha ki nongïalam jong ka party ba kin pynkhreh noh ïa ka elekshon,” u la ong.
“Ngi don ka jingkyrmen ba ngin jop biang mynta ka kynti ruh,” u la ong.
Na Shillong Seat, ïa mynta, la mih da u Bah Vincent H. Pala kum u MP ka Congress.
Haduh mynta, ki kyrtong kiba la paw kyrteng ban aireng na Shillong Seat ki long u kyrtong ka VPP Dr. Ricky J. Syngkon, ka kyrtong ka NPP ka Dr. Ampareen Lyngdoh bad u kyrtong ka RDA Bah Robert June Kharjahrin.
Na Tura, haduh mynta tang ka NPP kaba la pynbna ban pynieng biang ka Sitting MP ba mynta ka Agatha Sangma.
