Shillong, Nailur 04: Kawei ka dukan die ja bad sha kaba don ha Parking Lot jong ka Municipal hajan SBI Shillong ka la duh ei ïa ka bam ka dih bad ki khiew ki pliang, haba uwei u Pulit ba teh jaiñïong, u la leit kawang da u Stun Grenade haba ki dkhot jong ka HITO ki la leit rung ha kane ka dukan.
La ïohi ba ha ka por ba wan bret Bom Granade ki Pulit ka dukan ka khapngiah briew bha, ha kaba ki la shu ia thyngngian ban ïoh sha ïoh ja bad la suba ba kine kiba la rung bun ngut ki lah ban dei ki dkhot ka HITO kiba mut ban wan bam ja bad dihsha.
Hamar ka por ba ki trai dukan ki dang pyrshang ban pynkylluid ïa ka dukan bad mut ban shu song noh namar ba la khapngiah palat, kynsan la shu ïohi ïa ka jingbthei une u grenade bad ki trai dukan kiba dei ki kynthei ki la ïalynñiar da ka jingtieng bad ym tip kaei kaba jia. Ki briew kiba don ha kane ka dukan, ki la iakhun ban ïoh mih noh shabar bad don ruh kiba la mih na jingkhang ïit. Hadien katto katne por, la khan jai jai, ki la ïakylli mano ba leh kume bad la don ba jubab ba dei ki Pulit.
Halor kane ka jingjia, ka Seng KSU Mawlai Circle lyngba ka kyrwoh na u Presidentu Samla Biangbor Paliar ka la ong ba kine kiba shong dukan hangne kidei ki arngut ki Kynthei kiba shong ba sah ha Mawlai Mawtawar. Ka Seng haba pynrem jur ïa kane ka jingleh ki Pulit, ka la ong ba kane kadei ka jingthmu jong ki Pulit ban pynmynsaw ïa ki trai dukan bad kumjuh ruh ïa ki paidbah kiba wan bam ha kane ka dukan.
Ka Seng ka dawa badei ban pynshitom ïa ki Pulit kiba donkti ha kane ka jingjia namar kane ka rukom leh ka wanrah ka jingma ruh ïa ka jingim briew.
Kumjuh ruh ka Seng HYC Central Body, ka la pynrem jur ïa kane ka jingleh ki Pulit. U General Secretary ka Seng, u Bah Roy Kupar Synrem, u la ong ba kane ka jingjia ka la shu pyllait salit ïa ki trai dukan bad ki nongwan bam da ka said. U Bah Roy u la ong ruh ba donbon ba kane ka dukan ka khlem pyndonkam da ka Gas haba shet jingshet, ban dei ba ka pyndonkam da ka Gas kan jin da la jia ka jingïap briew kaba shyrkhei ha kane ka dukan.
Shuh shuh ka Seng ka dawa ruh ka jingpynshai na ki bor sorlar ba naei ki Pulit ki ïoh bor ban pyndonkam ïa kine ki jait tiar ba bthei ha ki dukan bad ki jaka paidbah ki bym ïadon bynta eiei ruh em bad kane ka jingïakhih. Ka Seng ka dawa ba dei ban pynshitom ïa ki Pulit kiym tip bad nang ban pyndonkamïa kine ki tiar, haba kidei ki tiar ban pyndonam tang haba pynpra ïa ki paidbah.
