Ngat arngut ki snar khaïi drok ha Pulit ka EJH
![](https://mawphor.com/wp-content/uploads/2022/05/mawphor-1-1.jpg)
Khliehriat, Nailur, 15: Arngut ki snar khaïi drok ïa kiba la tip kyrteng kum u Lorence Zomuanpuia, 32 snem uba sah ha Assam Bazar, ARC, Shillong bad u Lalmalsawa, 36 snem uba sah ha Hunthar veng, Aizawl, Mizoram ki la shah kem ha ki Pulit jong ka East Jaiñtia Hills District halor ka jingdonkti ban wanrah be-aiñ ïa u drok sha kane ka jylla Meghalaya.
U Kyrwoh ba la phah da u Superintendent of Police ka East Jaiñtia Hills u Jagpal Singh Dhanoa u la ïathuh, ha ka step sngi Thohdieng ki Pulit ki la ioh ïa ka jingtip kaba bniah na ki tnat syntiat ba ki ar tylli ki kali Tourist kiba wan na Mizoram ki la kit ïa ki tiar khaïi be-aiñ.
Mar mar, ki Pulit ka kynhun Anti-Narcotic Task Force (ANTF) ryngkat bad ki Pulit jong ka Umtyra Check gate bad ka Khliehriat Police Station ki la pynlong ka jingtalasi ïa ki kali ha ka shnong Nongsning hapoh ka jingïalam jong u Addl. Superintendent of Police jong ka East Jaiñtia Hills u Bah Banraplang Jyrwa.
U SP, u la ïathuh, dei ha ka por kumba 8:30 baje mynstep ki Pulit ki la bat ar tylli ki kali. Ha ka jingtalasi ïa ka kali banyngkong (Tata Sumo ML-05-M-1597) ha ryngkat ka jingdonlang ki nongsakhi, la lap saw tylli ki synduk thep sabon ba la thep ïa u powdar rong stem uba khia 43.33 gm, bad ha ka jingtalasi sa ïa ka kali kaba ar (Tata Sumo MZ-01-K-3872), la ioh kurup 44 tylli ki synduk thep sabon ba la thep ïa u powdar rong soh uba don ka jingkhia kaba 516.43 gm.
Ha ka jingtohkit bad eksamin la pynshisha ba u powdar u dei u drok heroin. Ïa drok ba la ioh kurup la song bad la kurup hakhmat ki nongsakhi. Ki Pulit ki la ioh kurup ruh T. 2, 200 ka pisa bad ar tylli ki mobile phone. Ha kaba ïadei bad kane, ki Pulit ki la register case hapoh ki kyndon jong ka NDPS Act ha Khliehriat Police Station bad ka jingtohkit halor kane ka dang ïaid shakhmat ban lap ksai sa ïa kiwei pat kiba donkti lang ban pynpoi ïa u drok sha kane ka jylla.