Mawkyrwat, Risaw, 30: Ki ar tylli jingjia ba sngewsih ki la jia hapoh jong ka South West Khasi Hills District ha kaba ar ki mynsiem ba kordor ki la duh ei ïa la ka jingim na ka daw jong ka jingngam jyllop kata i khyllung ba dang lai snem karta bad uwei u samla ba la khadsaw snem.
Ha ka tyllong khubor na ki pulit, la ïathuh ba ha ka jingïoh jingtip la ong ba ki la don ar tylli ki jingjia ba ki la ïoh kata kawei ka long, ka jingngam jyllop iwei i kyllung ba dang lai snem karta ha kawei ka top um (brite) kaba don kumba 60 liters ei ei ha kaba kane ka la jia ha ka por 2:30 janmiet jong ka 30 tarik u ‘Nailur, 2023. “I khyllung iba la ngam jyllop la tip kyrteng ïa i kum i (L) Mebanshan Thongni, 3 snem na ka shnong Marshillong, South West Khasi Hills District.
Shuh shuh ong ruh ba kane ka jingjia ka la jia ha ka por ba ka kmie ka dang bunkam ban khlieh jingkhlieh hapoh ïing katba u kpa pat u dang leit ban saitjaiñ bad hadien kata ka kmie ka la pyrta bad ita i khyllung bad i khlem pynphai ktien pynban haba ka la wad ïa i ka shem ba i la don hapoh jong ka top um. Namarkata, mar mar hadien kata ha ka por 3 baje ki la leit hapoh Civil Hospital Mawkyrwat ban phah sumar hynrei kaba sngewsih ka long ba u Medical & Health Officer u la pyntip ba i la ïap.
Kumta ha ka jingleh ïa ka postmortem, la ïathuh ba ha ka met jong ita i khyllung ym shym la don dak ei ei kaba suba sniew bad halor kane ka jingïap u kpa ruh um don kano kano ka jingsuba sniew hynrei ka dei beit ba i ngam jyllop. Namarkata, hadien ba la dep ki kam ba ïa dei bad ka aiñ ïa ka met jong ita i khyllung la aiti noh ha kiba ha ïing.
Ïa ka case la dep ban register bad ka jingtohkit ka dang ïaid shakhmat.
Ha kawei pat ka jingjia, uwei u samla uba ha ki karta 14 snem ei ei uba la tip kyrteng kum u (L) Mario Thongni na ka shnong Nongmallang u la ngam jyllop ha kawei ba ki khot ka wah Kynshi bad haduh mynta ïa ka met jong u ym pat lap dien bad na ka liang ka kynhun Search & Rescue Team ki dang pynlong ka jingleit wad ïa ka met jong u.
