Jowai, Risaw 01: Ki nongïalam ka Jaintia Student’s Union (JSU) hynnin ka sngi kila leit ban ïashim bynta lang ha nongbah Delhi ban ai jingkyrshan ba pura ïaka Khasi Author Society (KAS) ban dawa na ka sorkar India ban ithuh noh ïaka ktien Khasi hapoh ka khynit kaba 8 jong ka riti synshar.
Ha kane ka jingialang la wan shim bynta lang naduh ki montri sorkar kynthup ïa ka Kong Ampareen Lyngdoh bad u Bah Paul Lyngdoh, ryngkat ka jingdonlang naduh ki MLA bad MDC ka KHADC, ki kynhun sengbhalang naduh ka KSU, JSU, FKJGP, HYC, CORP bad ka HANM.
Na ka liang ka KAS ka la pynlong ïa kane ka jingïalang paitbah ha Jantar Mantar ha nongbah Delhi bad na liang ki nongïalam ka JSU ki lah wan shim bynta shit rhem naduh u President rangbah ka seng u samla Jersom Shylla bad u General Secretary samla Treiborlang R Suchen.
U samla Jersom ula ai ruh ïaka jingkren ha kane ka sngi da kaba ong lada ngi ïatylli kumne naduh ki Myntri sorkar haduh ki MLA, MDC bad ki sengbhalang ngin lah ban jop ïa ki daw bah ka jaitbynriew khlem ar tatien wat ïa u lum ki lah ban pait bad ula ïaroh ruh ïa ka seng KAS kiba lah shisha ban wanrah ïa ka jingtylli lyngba ka jingdawa ban pynrung ïaka ktein Khasi hapoh ka khyrnit kaba 8 jong riti synshar ka ri.
