Nongpoh, Naiwieng 15: U Bah Donkupar Sumer uwei naki nongïalam ka UDP ha Ri-Bhoi u ba la mih noh naka party dang shen, u la ther tyngeh ïaki nongïalam ka party UDP ha Ri-Bhoi kiba la kynnoh pynban ba ka jingmih jong u kadei ka daw shimet, bad naka liang ka party kam shym la leh beiñ ne leh shilliang khmat.
Haba kren sha ki lad pathai khubor mynta ka sngi ha Nongpoh, u Bah Donkupar Sumer u la ong ba katei ka jingkren ki nongïalam kiba la pyrshang ban da rapjot ïalade da kaba ong ba kum ka party kam shym la lehbeiñ ïa u, hynrei u la pynpaw pat ba ka daw ba u mih noh naka party ka dei namar ba ka party UDP naduh u President u Bah Donbok Khymdeit kam shym la kheiñ snep shuh ïa u bad kumba long haduh mynta ka party UDP la shu synshar donbor shi kñi shi pyrsa da u Bah Donbok Khymdeit.
“Lada ki nongïalam ka party UDP ha Ri-Bhoi ki ong ba kim shym la leh beiñ ïanga, nga la long u ba kloi ban ïatai ñia bad kitei ki nongïalam kiba pyrshang ban len bad dap rapjot ïaka jingleh jong ki bad kumba la paw haki lad pathai khubor la iohi ruh ka jingkren jong u Bah P Syiem u bym pat tip eiei ïaka party UDP bad u ba dang shu rung haka politik dang mynno” la ong u Bah Donkupar.
U la ong ruh ba lada kam dei ka jingleh donbor jong u Bah Donbok Khymdeit, ngam tharai ba ka kong Rona Khymdeit kaba dei ka para ba kan mih noh naka UDP ban pynïasoh bad ka Congress, khamtam ka jingmih noh jong ki nongïalam ba hakhmat bad bala kham ïaw haka party naduh u Bah Sunlight Shadap, Rayonald Kharkamni, Lawrence Nongrum, Ailong Pariat, Pynskhembor Sun, bad kiwei kiwei ki bym sngew ïahap shuh halor ka jingtreikam ka party UDP.
U la ong ruh ba ka jingkynnoh ba ha u snem 2013 u la pan tiket haka por ba long President ka KSU ka long kaba bakla namar u la shongthaid na ka KSU naduh u snem 2011 bad ban ong ba nga wan pan tiket ha u snem 2014 hadien bala khylliap lama ha u 2013 ka long kaba bakla, namar ngam shym la pan tiket, namar ki dei ka UDP Umsning Circle bad u Dr Donkupar Roy (Bam kwai ha dwar u Blei) kila wan ban mih shakhmat ban pan map ïaka jingbakla ha u snem 2013 bad kum u nongïalam u Bah Donbok um shym la tip bha shuwa ban kren sha ki lad pathai khubor.
Shuh shuh ka jingrem jong ka UDP ha u 2013 ka dei ka jingbakla bad ka jingleh jong ka UDP kiba la kyntait ïaki original UDP bad kam shym la sngap ïa kiba bun ba lang, hynrei ha u 2014 ka party ka jop haka elekshon MDC, watla ka elekshon 2018 ka long kaba eh ban ïakhun bad kumjuh ruh u 2019.
Naka liang jong nga nga la ïakren ban pynbeit ïaka kam bad ki kynrum kynram naka por shaka por hynrei kum ka party kam shym la sngap, watla kum u wei naki nongtrei ba shitrhem nga la trei shitom ban pynkiew ïaka party haka district, ha kaba la iohi ruh ba hapoh district u mama u ba dei u Bah Khymdeit um shym la ailad ïanga bad haka Youth Wing u Pyrsa u ba dei u Bah Jefrey Khymdeit um shym la ailad kaba pyni baka UDP ha Ri- Bhoi ka dei jong u mama bad u Pyrsa.
U la kynthoh ruh ba khlem da kynjoh ktien ïa u kum u Working President, la shu thung Secretary ïa u Bah Michael Kharhunai u ba dang shu pynïasoh bad ka party ha u snem 2019 tang namar ba u bah Michael bad u President ba rangbah u don haka juh ka kompani khlem da wanrah haka Executive Committee jong ka district.
Namarkata u Bah Donkupar Sumer u la kren shai b aka jingmih jong u ka dei namar ka jingleh beiñ, leh shilliang khmat jong ka party UDP haka jingïalam jong u Bah Donbok Khymdeit u ba la shu leh donbor bad lada kitei ki kyntait ïakata, naka liang jong u, u la long u ba kloi ban mih shakhmat ban ïatai markhmat ban sei ïaki daw bad ki jingleh jong ka party ki bym suid ñiew ïaka sur ba bun ba lang.
