Nga diaw ka mynsiem ba bun ki samla ki shu pynleh-noh-ei ïa la ka jingim bad ki ngop ha ki kamkai bad kiwei ki jingkwah brai: Pala

Mawkyrwat, Jymmang 19, 2023: Ka ophis jong ka Nehru Yuva Kendra Sangathan (NYKS), Ministry jong ka Youth Affairs bad Sports jong ka sorkar India mynta ka sngi ka la pynlong ïa ka District Level YUVA UTSAV India @2047 ba shi sngi kynthih ha Nativity Higher Secondary School Mawkyrwat, ha kaba u Member ka Parliament na ka Shillong Constituency, u Ma Vincent Pala u la long u kongsan.
Ïa kane ka prokram la pynlong halor ka phang “Panch Pran” da ka jingthmu ban kyntiew ïa ka ri, ban weng ïa ka jingsngew, ban sngewsarong ha kaei haba la buh, kaba la don naduh mynshwa, ban pynshlur ïa ka jinglong kawei bad jingïatylli bad ban tip ne sngewthuh ïa la ka kamram kum ki nongshong shnong jong kane ka ri jong ngi.
Kane ka prokram kaba kynthup ïa ka jingdro dur, ka jingthoh poetry, ka jingshondur, ka cultural festival bad contest la wan ïashimbynta da ki khynnah skul bapher bapher kiba don ha kane ka dong ka thaiñ. Tang ki khynnah kiba ha ka rta kaba 15 haduh 29 snem ki lah ban ïashimbynta ha ka District, State bad kumjuh ha ka National Level.
Ka jingthmu ba kongsan jong kane ka prokram ka long ban rakhe ïa ka ‘Azadi ka Amrit Mahotsav’ ban pynphriang bad pynsngewthuh ïa ka jingkordor bad ka jingmut jong ka jingïakhih laitluid bad ban nang ban ri bad burom ïa ka jingdon jong ki niam bad ki riti ki distur kiba pher ha ka ri hapdeng ki pata nongshong shnong.
U Ma Vincent Pala haba kren kum u kongsan u la ïaroh ïa ki dkhot jong kane ka organisation kiba la pynlong kum ïa kine ki rynsan ki ban long ka jingmyntoi bad ka jingkyrkhu ïa ki samla khnang ba kin lait na kaba pynlut por ha ki kamkai bad kiwei pat ki jingmlien ba sniew. U la bynrap shuh shuh ba ha ki 51 snem ba la leit kata naduh u snem 1972 kane ka organisation ka la leh shibun ki kam kiba bha hajan baroh ki 625 tylli ki distrik ha ka ri ha ki bynta bapher bapher na ka bynta ka bit ka biang jong ki samla. U la ong ba ka lawei jong ka ri ka shong eh ha ki samla kiba don ka jingkitkhlieh na ka bynta ka ïing ka sem, ka ri bad ka jaidbynriew.
Haba phai sha ki samla kiba ha kine ki sngi, u la pynpaw ïa ka jingsngewdiaw ba kiba bun ki samla ki shu pynleh-noh-ei ïa la ka jingim da kaba ngop noh ha ki kamkai bad kiwei kiwei ki jingkwah brai. Shuh shuh u la ong ba ha kine ki sngi kiba mynta kiba bun hi ki samla ki don ka jinglong ban pyrkhat shimet bad khwan myntoi, kaba pynlong ïa kiwei ban duh jingshaniah.
Namarkata, u la ong ba ka long kaba donkam ban pynkupbor ïa ki samla bad ban pynkhie im pat ïa ki da kaba kyntu ïa ki ban ïaid ha ka lynti kaba dei, ban long kiba tip-briew tip-blei, tip kur tip kha, kiba don ka akor ka burom, kiba kloi ban ïarap bad kiba don ka nongrim kaba skhem.
Ha kajuh ka por u la sneng bad pynkynmaw ïa ki samla ban long kiba ïai neh bad kiba ïatylli, kiba trei shitom khnang ba kin lah ban poi sha ka thong. U la pynkynmaw ruh ba ka jaidbynriew jong ngi ka long ka jaidbynriew kaba paw bha ha ka akor ka burom hynrei kaba la nang hiar arsut katba nangmih ki sngi. Kumta, u la kyntu bad hikai ïa ki samla ban nang ban jied ïa ki paralok, ban ïarap iwei ïa iwei bad ban kup ïa ki jinglong kiba bha khnang ba kin lah ban kham pynbha bad ban tei ïa ka lawei jong ka ïing ka sem bad ka jaidbynriew.
Ha kane ka sngi la ïoh ruh ki jingkren lyngkot ba u bah Carness Sohshang, MDC jong ka Mawkyrwat Constituency, u bah Damang Syngkon, District Sports Officer, South West Khasi Hills District bad u bah P. Wanniang, Myntri Shnong Sohkhyllam bad bud sa ka jingrwai kyrpang na ka Lapdianghun Nongsiej.
Ha kane ka sngi ka la don ruh ka jingïakop ryngkat ka jingsam ïa ki khusnam nongjop kata ki ha ka Mobile Photography la jop da u Wallandarson Lyngdoh, ha ka Poetry ka leit sha u Hanabon Syiemlieh, ha ka Painting u Mightyson Syiemlieh, ha ka Cultural ka jop ka Rimaram folk Academy bad ha ka Declamation contest la jop da ka Deitibaphylla.
Kham ha shwa, u bah Pynshngaiñ Lyngdoh Marshilong, National Youth Volunteers, Mawkyrwat u la pynïaid ïa ka jingïalang, u bah D. Rapsang, District Youth Officer u la pyllait ki kyntien pdiang sngewbha bad u bah Pynskhem Jyrwa, National Youth Volunteers, Mawkyrwat u la ai ki kyntien khublei.