Shillong, Risaw 02 : Ka Mawkynrew Constituency ha ka jingïaid lynti da ka jingïatreilang hapdeng u MLA ba mynta, Bah Banteidor Lyngdoh uba dei ruh u Myntri ba dei khmih ia ka tnad kam rep & kam ïalehkai sport ka Sorkar Jylla bad ki paidbah nongshong kane ka Constituency ka la nang kiew sha khmat ha ki liang bapher bapher.
Nalor ki surok kiba la kham bha haba nujor bad ki snem kiba la leit, ki skul pule, ka um bam bad jingkiew ha ka ïoh ka kot, ki lad ai jingsumar kiba don ha kane ka Constituency ruh ki la nang kham khlaiñ bad kham lah shuh shuh shuh ban ïarap ïa ki nongshong shnong ha ka jingdon jong ki ïa ki jaka ai jingsumar kiba bha.
Kane ka bynta ba ka Mawkynrew Constituency ka ïoh ïa ki jaka ai jingsumar ba bit ba biang ka la paw ha ka jingïalang plie paidbah ïa u mawnongrim myn ha ka 30 tarik u Nailur, 2022 ban kyntiew Community Health Centre (CHC) kyrdan ïa ka Primary Health Centre (PHC) kaba don ha shnong Jongksha kata hadien 26 snem naduh ba la plie ïa ka.
Kane ka CHC ha Jongksha kan dei ruh kaba nyngkong ha katei ka thaiñ ban ai jingshakri kham bha ïa ki paidbah ha ka liang ka jingai jingsumar ia kiba pang ba shitom. Ka jingtei ïa ka CHC kan long noh shen ha ka jaka ba la ai sngewbha da ka Kong A Rynjah.
La plie ïa u mawnongrim da u Bah ha ka jingïadon lang u Bah Martle N Mukhim, MDC ka Mawkynrew, ka Dr H. Lyndem, DHS (MI), ka Dr A. Lyngdoh, DMHO East Khasi Hills, u Bah G. Dhar, BDO ka Mawryngkneng C&RD Block, u Dr A.K Nongbri, Dr incharge Jongksha PHC, u Bah Olet Kharsahnoh, Sordar, ki ophisar ka tnad Health nalor kiwei pat.
Haba kren kum u Kongsan, u Bah Banteidor u la ong, “Nalor kane ka CHC, ka Mawkynrew Constituency kan sakhi ruh ïa ka jingkyntiew kyrdan ïa ka Health Centre ha Thynroit sha ka kyrdan PHC. Kumjuh ruh yn kyntiew kyrdan Health Centre noh ïa ki Sub Centre kiba don ha ka shnong Laitkyrhong, Nongjrong bad Lynshing”.
Da kaba shim ba baroh ki kam ban kyntiew ïa ka roi ka par ha ka thaiñ kiba u la lah ban pynurlong, u la ong ba ka dei ka jingïatreilang na ka liang ki bor pynïaid shnong ha ka thaiñ baroh kumjuh ki nongshong shnong. “Kine ki jaka ai jingsumar kin long ka jingmyntoi bad kin pynduna ïa ka jinglut jingsep ki nongshong shnong haba wad jingsumar haba pang ne shitom”, u la ong.
Ha ki snem ba la dep u MLA u la noh synñiang ruh sha ka Jongksha PHC da ka Ambulance ban ïarap ha kaba donkam ban kit noh ïa kiba shitom ba pang sha ki jaka ai jingsumar sha Shillong. Kane ka PHC ka la ai ka jingshakri ïa bun ngut ki longkmie kiba wan kha khyllung ruh nalor kiwei pat kiba wan wad jingsumar.
Na ka liang ka Dr H Lyndem, DHS MI ka la ong ba kane ka jingkyntiew kyrdan ïa ka Jongksha PHC kan dei ka jingkyrkhu ïa ki nongshong shnong ka thaiñ ha kaba ka jingai jingsumar kan nang kham bha shuh khamtam ïa ki longkmie kiba ar met.
U Bah Martle N Mukhim u la ong ba ka por ka la ïaid sted bha bad ki jingkylla ki la bun bad u la pynkynmaw ba mynshwa ki briew Sorkar kim nud ban wan sha ka thaiñ Mawkynrew hynrei mynta pat ki la sdang ban ïa tuid na kylleng kylleng ban ïoh wan jngoh ïa ka.
