Nang paw ki kam shyrkhei ha Iewduh, kren u CEM bad ki heh pulit ban buh pulit haman ki lad

Shillong, Nailar 29 : Ka jingjur palat ki kam tuh kam lute hapoh Ïewduh ka la poi haduh u pud ba u Chief Executive Member ka KHADC, Bah Pynïaid Sing Syiem ban hap tuklar hi dalade na bynta ka jingshngaiñ jong ki paidbah nongleit nongwan kiba leit ban die ban thied man ka sngi.
Na ka liang u CEM dalade hi ryngkat ka Executive Member ka tnad Market, Kong Grace Kharpuri nalor u Syiem ka Hima Mylliem, ki Myntri, Magistrate bad ki pulit, ki la leit ban jurip ïa katei ka ïew kaba heh tam ha ka jylla hadien ba ki la ïoh pdiang ïa ka jingujor halor ka jingbym don shuh ka jingshngaiñ na ka daw ka jingbun palat ki nongtuh.
“Ngi la pyntip ïa u Sector Officer jong ka Police Department ban buh ïa ki bor pahara haman ki lad ban rung sha Ïewduh khnang lada don mano mano ba pyrta lehse ki longkmie ne ki khunlung khynnah ne kynthei brïew ne ki samla rangbah ba shah tuh, haba don ki pulit bad ruh ki pulit syiem lah ban ïoh kem noh. Hynrei haba ngim don brïew u nongtuh u la lait phet ei. Kumta na ka liang jongngi haba jia mynsngi mynshai ngi lah ban kem ïa kita ki brïew lyngba ki CCTV,” u la ong.
U ong ruh ba ka jingdon jong ka Kong Grace kum ka EM ba peit ïa ka ïew ka hat kan pyntikna ba kawei na ki projek jong ka Council ban pynbha bad kyntïew ïa ka riti dustur khamtam haba ïadei bad ka ïew tynrai kaba dei ka Ïewduh, kin sa lah ban pynkylla ïa ka.
Shuh shuh u ong ruh ba na bynta ki jaka ba hap ha ka jingpeit jong ka Council, shen yn sa buh noh da ki CCTV bad ruh ki streetlight bad ha ki jaka ba hap ha ka Muncipal kin sa shu ai jingmut ban pynthymmai noh ïa ki CCTV bad ruh ïa ki street light.
Haba ïadei pat bad ka khuid ka suba hapoh ïew, u CEM u la kular ba na ka liang ka Council kan sa ai ar tylli ki kali kit ñiut khnang ba kan ym don shuh ka jingsma na ki jaboh kiba lang thup ha ki jaka ba don ki jaka bret niut kumba ki sakhi ha katei ka sngi ha Motphran.
Kawei pat ka bynta kaba u CEM u bthah ïa ka tnad Enforcement ka long ba kan khynra ïa ki trading licence ïa ki bar jylla kiba die jingdie ha Ïewduh khamtam naduh Motphran ter ter shaduh jan Bimola.
Ïa kane u la bthah hadien ba ki la lap ba don bun ki bar jylla kiba die jingdie harud surok hynrei kiba phet krad mar ïa ïohi ïa u CEM bad ka kynhun.
“Nga la bthah ïa u Superintendent Enforcement jong ka Council ban hiar talasi Trading Licence bad ban tohkit ïa kine ki dukan madan jong ki bar Jylla kiba die juti bad kiwei kiwei ki mar. Nga la ai ruh ïa ka hukum ba ïa kibym don Licence, dei ban weng noh na kitei ki jaka”.
Shuh shuh u ong ruh ba lada don kino kino ki Khasi kiba wan kam trai ïa kitei ki dukan, ki dei ban wan mih sha KHADC ban ai jingpynshai.