Resubelpara, Rymphang 22 : U National President ka National People’s Party (NPP) Conrad K Sangma ula ong ba ka NPP kala nang khlaiñ ha kine ki san snem katba kiwei pat ki seng saiñ pyrthei kila nang troiñ katba dang ïaid ki sngi, kaba pyni ïa ka jingshaniah jong ki paidbah ïa ka party.
U Conrad ula kren ïa kane na ki rynsan ialap elekshon ha Ri-lum Garo hynne ka sngi Balang. Watla kiwei ki seng saiñ pyrthei kila pynjur ïa ka jingïalap elekshon da ki jingkawang ktien ïa ka Sorkar MDA ba ïalam da ka NPP, hynrei u Conrad ula kiar na ki jingkawang ktieh kylliang pynban ula ban jur halor ka roi ka par bad ka jingsuk kaba ka Sorkar NPP kala wanrah sha ki paidbah ka Jylla ha kine ki san snem bad buh ruh ïa ka bha ka miat bad jingangnud jong ki paidbah hakhmat eh ban ïa kiei kiei baroh.
U Conrad ula ong “Ka NPP kala nang khlaiñ nang khlaiñ ha kine ki 5 snem bala leit noh katba kiwei pat ki seng saiñ pyrthei ba ïalehkai pyrshah kila nang tlot, kaba pyni ïa ka jingshaniah u paidbah ïa ka party. Ula ong, dei namar kane, u sngewskhem ba ka NPP kan jop kput ha kane ka elekshon MLA ban wan, kaban ailad ïa ka party ban thaw ïa ka Sorkar ba marwei, kaban urlong tang arsien ha ka histori jong ka Meghalaya nalor ka APHLC kaba jop 32 seat ha ka elekshon 1972.
Hynne ka sngi Balang, u Conrad ula pynleit jingmut ha ki artylli ki constituency ka North Garo Hills-Resubelpara bad Mendipathar ban pan jingkyrshan na ki paidbah ïa u Timothy D Shira kum u kyrtong ka Resubelpara bad u Marthon Sangma na Mendipathar.
Ha madan Daram kaba hap hapoh ka Resubelpara constituency, u Conrad ula kyntu ïa ki paidbah ba kin ïawanlang ha ka ban vote ïa ka party kaba don ka mynsiem ban kitkhiah ïa ka Meghalaya. “Ha u 2018, ka jinglong jingman ka saiñ pyrthei kala ïapher bha bad kane kala kylla bha mynta. Kiba bun ki seng saiñ pyrthei ha Meghalaya kila nang tlot ha kine ki san snem katba ka NPP kala nang ïohbor kum ka seng saiñ pyrthei kaba khlaiñ duh ha ka Jylla” ula ong.
U Conrad ula ong ba ka Congress kala khlaiñ bha ha ka thaiñ hynei mynta kala troiñ bha namar ki nongïalam jong ka,kila phet sha ka Trinamool Congress (TMC). “Mynta ka Congress bad ka TMC kila ïalap elekshon ban pynpawnam ïala ka jong ka party, bad lada peit ïa ka rukom ïakawang ktieh te la itynnad bha” ong u Conrad.
