Tura, Jymmang 22 : Ka Director General of Police (DGP) ka Kong Idashisha Nongrang ha ka sngi Palei, ka la pynpaw ïa ka jing sngewkhia jur halor ka jingnang kynrei bad jyllei ki kam ba ïadei bad u droks ha ri-lum Garo, haba ban jur ïa ka jingdonkam ban pynkhlaiñ ïa ka jingtehlakam bad jingtuklar ha ka por kaba biang ban khanglad ïa ka jingeh ba kan nang heh shuh shuh ha ka thaiñ.
Haba kren sha ki lad pathai khubor, ka kong Nongrang ka la ong ba ki bor khmih ki la peit pyrman bad pyrkhng bha ïa ka jingkiew ki kam droks hapoh ka thaiñ Sepngi ka Meghalaya bad ngeit ba ka dei kaba dang lah ban tehlakam lada pynkhlaiñ noh mynta ïa ki lad ki lynti ban bud dien bad ban nang ïai treikam bha.
“Watla ka la don ka jingkiew ha ki kam kiba ïadei bad u droks, lada ngi lah ban peitbniah mynta, ngi dang lah ban tehlakam” ong ka DGP.
Kala pynpaw ba ki District Anti Narcotics Task Force (ANTF) ki dei kiba shim ïa ka jingkitkhlieh ban ïakhun ïa ka jingpynïaid ïew ïa u droks ha Meghalaya. Hynrei, ka la kubur ba ka District ANTF ha Tura kam shym la treikam bha kumba long kiwei ki Unit bad ong ki jingpyrshang ki la ïaid shakhmat ban pynkhlaiñ ïa ki jingkhynra.
Ka DGP kala maham pyrshah ban ailad ïa ka ri-lum Garo ba kan mad ïa kajuh ka jinglong jingman kumba la mad ha ki thaiñ Mihngi ka Meghalaya ha kine ki snem ba la leit.
“Ngi thikna ba ngim kwah ba kaei kaba jia ha ka Eastern Range (Khasi-Jaintia) kan jia lang ha ka Western Range (ri-lum Garo) haba phai sha u droks” kala ong.
Ka kong Nongrang ka la kdew ba ka Meghalaya, kaba ju ïapeit baroh kum ka lynti ïaid jong u droks ha ki snem ba la leit noh, mynta ka la sakhi ïa ka jingnang bun ki nongdih droks, ka rukom long kaba long ka jingsngewkhia kaba khraw ha ka imlang ka sahlang.
Kat kum ka jingong jong ka, u droks ba la ïoh kurup na ri-lum Garo uba bun hi u dei uba wan na kiwei pat ki bynta jong ka Ri bad rung lyngba ka Assam ym lyngba ka Bangladesh.
“Kaei kaba wan sha ri-lum Garo na Bangladesh ka dei kaba duna eh haba ïa nujor bad kaei kaba wan na kiwei pat ki bynta jong ka Ri” kala ong.
