Nang jot ka surok NH-6, bam pum pum ki paidbah ha Khliehriat bad ha Narpuh
Ym pat maramot ïa ka surok NH-6
![](https://mawphor.com/wp-content/uploads/2023/11/Surok-NH.jpg)
Khliehriat, Naiwieng, 02: Ki paidbah jong ka East Jaiñtia Hills District, kim lah shuh ban sngewthuh bad ki don mynta hapdeng ka umdum namar ka jingleh mynthi bad leh kuman jong ka Sorkar bad ka National Highway Authority of India (NHAI) ki bym shimkhia eiei ruh ban maramot ïa ka surok National Highway-6 kaba la jot la pra bad kaba la buh jingeh haduh katta katta ïa ki paidbah ym tang kiba leit ka wan hynrei wat ïa kiba shong ïing bad shong dukan harud surok ruh ki mad jingeh.
Ym lah ban len ba wat ha Khliehriat ruh kaba dei ka District Head Quarter jong ka East Jaiñtia Hills District haba peit ïa ka surok la i thik kum ka surok khlaw kaba la dap sa tang ka khyndew pum pum kaba la buh jingma haduh katta katta wat ïa ka koit ka khiah jong ki paidbah ruh kiba hap ban ring mynsiem ïa u pum pum manla ka sngi khamtam kito kiba shong dukan harud surok khñium haduh katta katta.
Ha ka thaiñ Narpuh baroh kawei, la ong ba kiba bun ki dukan ki hap ban khang wat ïa ka jingkhang ruh namar ka jingjur palat ka jingher jong u pum pum na ka jingjot jng ka surok uba la rung wat sha ki thliew ïing jong ki briew bad sha ki dukan die ja bad die sha.
Ki paidbah ki la ud haduh katta katta ba u pumpum u la rung wat shaduh u khiew ja bad na kata ka daw kiba bun ki dukan die ja bad die sha ki hap ban khang ïa ki jingkhang watla ka dei ka dukan ruh.
Haba pynpaw ïa ka jingsngewkhia ïa kane ka jingim syrtok, ki paidbah ki la ong, “ka Sorkar bad ka NHAI ka la lehbeiñ shaba palat ïa ngi ki paidbah ka East Jaiñtia Hills District.”
Ki sengbhalang, ki paidbah kiba na ka thaiñ Narpuh bad na ka thaiñ Khliehriat, ki la pynlong da ki jingïakhih paidbah ban pynsngew sha ka Sorkar bad sha ka NHAI ïa ka jingeh ba ki ïakynduh ha ka leit ka wan na ka daw ka jing sniew shaba palat liam jong ka surokbah National Highway.
Ka Khasi Students Union (KSU) Narpuh Circle la bun-bun bnai ka ladep ruh ban khang tala wat ïa ka Toll Plaza ne ka jaka khrong khajna jong ka NHAI kaba don ha Lumshnong hynrei watla katta ruh ka Sorkar bad ka NHAI ki dang leh kyllut, leh mynthi bad khlem pyrkhat ei ei ruh ïa ka jingeh jong ki paidbah.
Namar ka jingsniew jong ka surok, ka wanrah ruh ïa ka jingdheng kali ba khah khah ha kiba bun ki bynta ha surok ha East Jaiñtia Hills District, ka buh jingma ruh ïa kiba ñiah kali, kiba shong kali bad kiba ïaid ha lynti.
Ki paidbah ki la mad ïa ka jingjyrsieh ba jur bha khamtam ha ka por slap bad ha ka por ba rang ka bneng ki hap ban ring mynsiem da u pum pum khyndew ba shyrkhei.