Ha shnong trai kynmaw burom ïa ka lyngkhuh sngi ïap ba 64 snem u Rev JJM Nichols Roy

Shillong, Naiwieng 02: Ka Seng Samla Kher Ramsongkatonor, Shella ha ka 01 tarik u Naiwieng 2023 ka la rakhe ïa ka lyngkhuh sngi khlad ba 64 u kpa ka District Council u Rev JJM Nichols Roy ha ka shnong Kher Ramsongkatonor kaba dei ka shnong trai ba la kha bad ba u Rev JJM Nichols Roy u la heh la san.
Ïa kane ka sngi kynmaw burom la sdang ïa ka programme da ka jingbuh syntiew ha u mot sah jingkynmaw ïa u Bah Joy ha Jasir Shella hapoh ka jingïalam jong U President ka Seng Samla Kher Ramsongkatonor U Samla Mac Donald Pahsyntiew ha ryngkat ka jingdon lang ki nongkit kam bad ki dkhot jong ka Seng Samla. Nangta la pynbud sa da ka Programme kyrpang ka Seminar halor ka phang “Ka jingim bad Ka jingtrei I Rev. J.J.M. Nichols Roy” ïa ka ba la ai da u Dr. S. Kharsyiemlieh u Nongbishar ba la shongthait jong ka District Council Court.
Ïa Ka Seminar ha kane ka sngi la pynïaid da I Secertary ka Dorbar Kher Ramsongkatonor Shri. Consolarlang Swett, la ïoh ïa ka jingkren pdiang bad kren lyngkot na i General Secretary jong ka Seng Samla Kher Ramsongkatonor u samla Wanteidor Rajee.
Ki kynrem ki lyndan kiba la ïa don ryngkat ha kane ka sngi ki long u Bah H. Syiem Deputy Secretary ka KHADC, u Bah B. Kharbamon Superintendent KHADC nangta U Acting Wahadadar jong ka Shella Confederacy u Komen Laitmon bad la pynshngaiñ da ka jingïasynran lang ki Riew Rangbah, ki Secretary Kher, ki Member jong ka Dorbar Shnong Shella ryngkat u Secretary jong ka Dorbar Shnong Shella Bah Tobias Tiewdop, nangta u Bah Kit Suting Project Manager SPVS ha ka jingdon lang ki khynnah skul na RKM Secondary School Shella, bad kumjuh ruh ki riew paidbah.
Ki Nongkren ha kane ka sngi ki la pynkynmaw ïa ki kam kiba khraw ki ba u Rev. J.J.M. Nichols Roy u la leh na ka bynta ka Jaidbynriew Khasi bad ki rit paid hapoh ka Ri India, kiba la ai ïa ka jingkren lyngkot ha kane ka sngi ki long i Bah R.L. Roy, u Bah T. Youthborne Ex-Headman, Bah Tobias Tiewdopt Secretary Dorbar Shnong Shella, u Bah Komen Laitmon Acting Wahadadar, u Bah Banrilang Kharbamon Superintendent KHADC, u Bah H. Syiem Deputy Secretary ka Excutive Committee KHADC.
U Dr. S. Kharsyiemlieh ha ba ai ïa ka jingkren halor ka phang “Ka Jingim bad ka Jingtrei I Rev J.J.M. Nichols Roy” u la pynkynmaw ba kumno U Blei U la sei kyrpang ïa u Bah Joy na ka bynta ban long u nongïada ïa ka jaidbynriew, u la ïathuh ïa ki kam kiba khraw kiba une u Riew Khraw u la leh kiba long shisha ka jingkyrkhu ym tang ïa ka Jaidbynriew rit paid hynrei ia kiwei ruh ki jaidbynriew rit paid kiba don ha ka thaiñ North East.
“Ka jingïohi jngai jong u Bah Joy ka long shisha ka jingkyrkhu kaba khraw tam ia ka jaitbynriew Khasi jongngi,” u la ong
Shuh shuh u la kyntu bad ai mynsiem ïa ka Seng Samla ban sei ïa ki nongialam khamtam eh napoh shnong Shella kiba long kum u Bah Joy. La ïoh ruh ïa ka jing kren ai khublei na uVice President jong ka Seng Samla Kher Ramsongkatonor u samla Specialson Sarubai.