Ka kyrdan longbriew manbriew katba nang mih ki sngi ka la nang hiar dor namar ki kam runar kiba sngewtriem bad kiba pynkhynñiuh met ba la leh da ki riewthrang snam bad ki briew ki bym don shuh ka mynsiem ïatiplem kiba kloi ban dkhat ïa ka mynsiem briew tang ban pynhun ïa la ka jingthrew ka dohnud.
Haba phai khyndiat shaphang ka imlang ka sahlang la ka long ha ka raid ki hima ne ha ka jylla hi baroh kawei ka jingkylli ka mih hangne balei keiñ katba dang mih ki sngi bad ki snem la ïohi ba dang mih bun shuh shuh ki jaid jingsniew kiba ha rumkom ha ka imlang ka sahlang ne wat ha ki ïing ki sem kaba la buh jingma shisha ba ka bor jong ka jingsniew ka la trei bor bah ha kine ki sngi.
Haba ngi phai sha ki Khubor ne ki Telivision bunsien ngim ju ïohsngew shuh ïa kita ki sur kiba ai mynsiem ne kaba kren shaphang ka shongsuk shongsaiñ ne shaphang ka bha ka miat ha ka imlang ka sahlang, hynrei la ïohsngew sa tang ki kam leh donbor, ki kam thombor bad ki kam sniew kiba harukom.
Hynrei ka jingkylli ka mih hangne, Hato, man la uwei-u-wei ba ba la kot ïa ki bor sngewthuh ne ki bor pyrkhat, ngi la ju puson mo ba balei ki mih kine ki kam sniew kiba ha rukom ha ka imlang ka sahlang kaba la pyntad dor ïa ka hok longbriew manbriew bad haduh ka akor ka burom kaba la hiar dor arsut kaba la ïohi ba I kumba aiñ Blei ne ka aiñ Briew kam don shuh.
Na ka por sha ka por, ki mih ki kam tuh ki kam thiem, ki kam pyniap, ki kam lute, ki kam leh beijot ne lehdon bor ïa ki kynthei ki khynnah ha kaba kam don shuh kata ka jingshngaiñ ha ka imlang ka sahlang khamtam ïa ki kynthei ki khynnah. Khyndiat pat lah ban ong hangne ba man la uwei-pauwei u la dei ban puson ïalade shimet halor ka jingkynrei kine ki kam sniew kiba la ktah shisha ïa ka shongsuk shongsaiñ ha ka imlang ka sahlang jong ka jylla.
Ym lah ruh ban len bunsien haba ïohi ïa ki kam sniew la ka long ha ki Kot Khubor ne ki kor Telivision la ïoh sngew tang kata ka jingkren ïa kynïi hapdeng ki para briew bad ka jingkhnium kaba mih na ka shyntur kaba ki da sngewpangnud ba kynrei ki kam sniew. Ka jingkylli ka mih pat hangne. Hato, katno ngut kiba ju puson ne pyrkhat na ei ka tynrai jong ka jingsniew ka wan bad balei ba ka jur ki kam sniew ha kine ki sngi?
Sngew Sangsot ba ki briew ha kine ki sngi la ka long naduh ki khynnah, ki samla bad haduh ki tymmen ki San tang namar ka spah pyrthei bad ba ki ïa beh ïa kata ka ‘Rongphong Pyrthei” bad kim don por shuh ban puson ne ban pyrkhat halor ki tynrai ba ka jingsniew ka sdang ban mih. Hynrei ki la shu ïa beh ïa kata ka spah pyrthei bad ki klet noh ban puson ne ban bishar ïa ka tynrai ba ka jingsniew ka mih kaba la ktah shisha ïa ka shongsuk shongsaiñ ha ka imlang ka sahlang ha ka jylla bad ka ri.
Kum ban shu ong, ka Jylla jongngi ka dei ka jylla kaba bun tam ki Kristan bad nai ïa kren ïa kata ka bynta, namar la ka long ka niam Kristan ne kino kino ki niam ba kynthup naduh ki Hindu, ki Muslim, ki Sikh bad kiwei kiwei ki jaid niam ruh, Ka tynrai jong ka jingngeit bad ka jinghikai ka niam ka long hi shi bynta ban im hok im sot bad ban long kita ki ki jingthaw kiba don ïa ki iktiar ban wan rah ïa ka shongsuk shongsaiñ ha ki ïing ki sem ne ha ka imlang ka sahlang, Phewse!!!!! Da khongpong ha kine ki sngi ka jingsniew ka la shong kulai ha man la uwei-pauwei u Briew kiba la klet noh ïa la ka jong ka tynrai kiba la pyrshang ban beh ïa ka Rongphong bad ki jingkwah brai kaba la pyntroiñ shisha ïa ka hok Longbriew Manbriew.
Nai da ïatai sani shaphang ki tynrai ba ka jingsniew ka mih, hynrei to ngin ïa phai dien khyndiat ban puson kumba ong kine ka Kyntien, “Ka kam Leh isnei ne ka kam babha ka sdang na la Rympei” khnang ba ngin sngewthuh ba balei ba kynrei ki kam sniew kam smeh ha kine ki sngi.
Kum ban ban ktien, ha kine ki sngi kano kano ka longïing longsem kim don por shuh ban hikai ïa la ki khun ki kti ha la rympei “sawdong ka Lyngwiar Dpei” namar ba ki la ïa beh ïa ki rongphong jong kane ka pyrthei bad kim don por shuh ruh ban shim ïa la ka jingkitkhlieh ïa ki khun ki kti ha kaba ki la ai mon khlem da tehlakam ha la ïing la sem.
Bad ym donkam hi ruh ban ïa puson halor ki daw ba ki jingsniew ki la kynrei ha kine ki sngi, Ngi lah ban kren shai sha ka pyrthei, dei tang namar ba ki kmie ki kpa ne ki Longkni Longkpa ha kine ki sngi kim don por shuh ban sneng ne kyntu ïa la ki khun ki Pyrsa ha la ïing la sem bad ki khun ki kti ki la im laitlan katba ki mon ha kaba ki la sdang ban leh na i kam sniew i barit bad kan sa pur pat haduh ba ki jingsniew ki la kiew skong ha kine ki sngi.
Kumba ong ka Kyntien, i jingjaw um barit, ka pyndap ïa ki phnieng ka Duriaw” ka la urlong shisha, namar tang na ka daw ba ki Kmie ki kpa ne ki Longknie ki Longkpa kim don por shuh ban tehlakam ïa ki khun ki kti ne ki Pyrsa ba ki la im laitlan ka la pynlong ruh ïa ki ban kin dang shlur ban leh ïa bun bah ki kam sniew kiba la ktah ha ka imlang ka sahlang.
Namarkata, To!!!! nai ïa wad shuh ïa kiwei pat ki daw ne ki tynrai ba ka jingsniew ka mih, hynrei to kum ki Longïing Longsem ne ki Kmie ki kpa ngin ïa pyrshang ban hikai ïa la ki khun ki Kti ha la Rympei ka jong ka Rympei, namar dei tang ha la Rympei lah biang ban saiñ dur ïa ka hok long briew man briew ne ïa ka akor ka burom kaba ngi lah ban ïada na bun jaid ki kam sniew kam smeh ha ka imlang ka sahlang.
Kyntang ïawai, kano kano ka ing kaba don ïa ka jingïatylli, ka jingïasngewthuh jingmut bad ka jingïaieit ba mar kylliang ka don kata ka jingtieng burom ban leh ïa ki kam sniew, hynrei lada kano kano ka ïing kaba ïa pait ïa pra ym lah ruh ban len ba ki mih bun ki jingïapait ïa pra ha kaba ki kam sniew ruh ki don hangta naba ym don uta u ‘Shabuk’ kumba u Nonglur u pynkohnguh ïa ki Masi ha ba ki lur ïa ki lyngkha ban pyndep ïa ka kam…….
To ïa pyrkhat hi maphi bad ïa kyrtiang dien ïa kitei ki symboh pyrkhat kiba ong, “ Ka kam isynei ne ki kam babha ki sdang na la Rympei” bad nai ïa bunktien shuh ba Balei ki kynrei ki kam sniew.
