Namar ka jingrben ka ktieh, sahkut da ki kynta ki kali ha surok Nongstoiñ sha Wahkaji

Mawkyrwat, ‘Nailar 01: Ki nongniah kali bad ki paidbah kiba ju kamai kali na ka surok Nongstoiñ sha ki thaiñ Mawkyrwat bad ki thaiñ Wahkaji ha kine ki sngi ba wan ka lyiur ki la ïa kynduh jingeh namar ka jingsniew ha ki katto katne ki jaka jong ka surok Nongstoiñ sha Wahkaji, South West Khasi Hills District.
Katkum ka jingïathuh jong ki nongñiah kali, ki la ong ba namar ka jingsniew palat ka leit ka wan ruh bun sien ka thut bad ka jingsahkut ki kali ruh ka la pynthut shikatdei ïa ka ïaid ka ïeng ki paidbah. “Ka jingsah kut ki kali da ki kynta, kane ka pynthud ïa ka ïaid ka ïeng bad bunsien ïa kane la sakhie ha ka wei kaja ka ha shnong Nonglwai, West Khasi Hills District ba ki kali ki la sahkut ha ka ktieh ha kaba hap ban ïa khynniat ruh da ki briew khamtam ïa ki kali rit, kim lait shuh ban ïaid na ka jingsahkut namar ka jingktieh ka surok”, ki la ïathuh.
Shuh shuh ki la ong ruh ba kane kam dei ka sien ba nyngkong hynrei bunsien ki kali ki hap ban sahkut da ki kynta haduh ban da lait ki la ong ruh ba ka jingeh ka dei namar ka jingbym shimkhia katei ka kompani ba pyntrei ïa katei ka surok ba ki theh tang da ka khyndew ha kaba ka sa pynlong ïa ka surok bad ki kali ba kin hap ban sah kut.
Namarkata, na ka liang ki nongñiah kali bad ki paidbah ki la kyrpad ïa ka kmpani ba kan ban pyrkhat lem ïa ka ïaid ka ïeng jong ki kali da kaba kin wan ban pyndap da ki maw khnang ba kan ym don ka jingsah kut jong ki kali bad ruh ba ki briew kiba leit donkam ha kino kino ki bynta kin ym duh ei.