Ba kheiñ sting ka Kompeni shna surok leit ïakynduh ka FKJGP ïa u EE PWD

Nongstoiñ, Nailar 1: Watla ka jingshna shait shait ïa ka surok two lane na Nongstoiñ-Rambrai-Chaygaon ka la pynkmen shibun ïa ki paitbah, hynrei namar ba ka dei ka aïom slap, kumta ka la pynthut haduh katta katta ïa ka leit ka wan jong ki paitbah nongshong shnong khamtam ha ka kit ka bah, ka pang ka shitom.
Halor kane ka jingeh ba ki paidbah ki kynduh, ki nongïalam ka FKJGP Rambrai circle ki la leit ban ïa u Executive Engineer ka tnad PWD Nongstoiñ, na ka bynta ban kyrpad ba un tuklar lem bad ba un ïakren bad ki Engineer jong ka Kompeni ba kin ïapeit lem ha kaba thep maw ha ki jaka kiba la sniew palat namar ba ki kali kim lait shuh.
Ha katei ka jingleit ïakynduh jong ki u Executive Engineer um shym la wan trei, kumta kitei ki nongïalam ka seng ki la leit ban ïakynduh ïa u bah S.Puweiñ Assistant Engineer ha kaba ki la ai ruh da ka jingthoh na ka bynta ba ma u ryngkat u Executive Engineer kin tuklar lem.
U bah Jiedstarland Lyngkhoi President ka circle haba ïakren ban ki nongthoh khubor hadien ba ki la mih na kamra treikam jong u Assistant Engineer, u la ong ba ka jingleit ïakynduh jong ki ïa kitei ki ophisar ka PWD, kam mut ba kin pynwit ïa ka jingpyntrei ïa katei ka surok. Hynrei, ban kyrpad ba ka Kompeni kam dei ban kheiñ sting bad ban shu ieh kumto ïa kito ki bynta kiba la sniew shaba palat, hynrei ka dei ban peit lem da kaba thep maw, khnang ba ka leit ka wan ka kit ka bah kan ym thut.
Utei u nongïalam ka seng u la ong ruh ba ha kine ki sngi, ki kali kiba leit sha Sohmynthar, Mawthir, Mawdumdum, Kyllang bad kiwei kiwei ki shnong ha katei ka thaiñ, kim lait shuh wat ki Mahindra pickup kiba dei ki four wheel ruh kim lait shuh. Kumta ki paitbah kiba wan donkam sha Rambrai, Nongstoiñ bad kiwei kiwei ki shnong ki hap ban ïaid da ka kjat.
U la ong ruh ba naduh Mawdumdum bad Kyllang, lada ïaid da ka kjat ka shim por kumba lai kynta tam kata lada dei ki shynrang kiba mlien ban ïaid kjat, hynrei lada dei ki kynthei lei lei ka lah ban shim por haduh saw kynta. Nalor kata u la ong ruh ba dang ha kine ki sngi la don iwei I khynnah I ba shitom jur bad la don kam ban kit kyrkieh sha Rambrai PHC, hynrei namar ba ym lait kali shuh itei I khynnah I la khlad noh.
Nalorkata ka la shem shitom haduh katta katta ban kit ïa ki mar bam ban pynpoi sha bun tylli ki shnong ha katei ka thaiñ. U la ong ruh ba ha katei ka jingleit ïakynduh u Assistant Engineer, u la kular ban shimkhia bad ban ïakren bad ki heh ka Kompeni ba kin ïarap lem ban pynthep maw ha kitei ki jaka tang ban lait ki kali.
Nalorkata ka surok kaba la dep tih bad kaba sniew bha mynta ka dei kumba shi kilomitar na ka jingkieng Syllang sha khmat bad ki kali rit ki la shem shitom palat ban ïaid. Kumta ki la kyrpad ruh ba na ka liang ka PWD kan bthah ïa ka Kompeni ba kan siang maw noh ïa katei ka bynta ruh.
U la ong ruh ba ka long kaba I lehraiñ ban peit ba ki don ki jaka ba la dep shna kynroh bad muri, hynrei tang mar shu wan u slap ki la twa namar ka jingtrei torti palat jong ki nongtrei. U la ong ruh ba ka Kompeni kam dei ban ai jingtrei ha ki kontrak ki bym pat biang namar ka jingduh nong ka dei ïa ki paitbah.