Namar ka jingduk tasam, ki para ri, ki hap leit wad bylla kat shaba poi ban pyndap la ka kpoh

Sa kawei ka khubor, kaba sngewngiew, ka la leit lynshop ïa kawei ka longkmie Khasi, kaba leit bylla trei ïing sha Nagpur, Maharashtra bad katei ka longkmie kaba sniewbok, ka la shah bom kput, ha ka trai ïing jong ka.
Kane ka jingjia, ka dei kawei na shibun kiwei pat ki jingjia kiba ki khun Khasi, kiba kwah ban leit trei leit ktah shabar, ki mad ïa kiba kum kine ki apot sepsngi bad ha shwa jong kane ngim dei ruh ban klet ïa ki 2 ngut ki hep rit jong ngi, kiba la ïap ei, ha ka jingleit skul sha Karnataka bad sa ki phew ngut kiba ïohpang, na ka jingbsa ïa ki, da ka bam kaba la bret ki briew.
Ban leit ïalam ïa ki khun Khasi jong ngi sha ri thor, kam dei kaba suk, khamtam lada ki dei kiba dang rit ka rta lane ïa kito ki bym don kyrdan ha ka pule puthi bad kawei na ki daw, ka dei na ka ktien, ha kaba kito ki khynnah lane ki nongtrei bylla, kim nang ban kren da ka ktien kaba ki kren ha kito ki shnong bad kumta kam long kaba suk, ba kin leit thied leit pet, leit ïew leit hat bad wat ba kin tong um tong wah lane kiwei pat ki jingdonkam.
Ka don sa kawei ka jingïapher bad kata ka long ba ki Khasi jong ngi, kim ju mlien ban dem ha sla jat jong kiba heh lane ki kynrad, haba treikam treijam bad haba kim dem kumta, ka pyni ruh ba ka jingñiew burom jong ki, ïa la ki jong ki kynrad kam ïahab satia, ban ïanujor bad kito ki nongtrei trai shnong bad katei ka don jingïadei ha ka shet ka tiew, ka sum ka sait, ka bam ka dih, ha kaba ki nongtrei ki dei ban ailad shwa ïa ki kynrad jong ki ba kin bam hakhmat bad kin sa pynbud pat ma ki, ynda ki la dep ki kynrad.
Kam dei tang kata, wat ka rukom bam ruh ka ïapher shibun, ha kaba ki briew jong ngi, kim lah ban taw wat tang shisien taw ka ja ruh, lada kim ïoh doh masi, dohsniang, lane ka tungtap bad ka tungrymbai bad kam dei tang kata, ki dkhar hi kiba bun, ki dang sngewtynnad ruh, haba dei ka por bam ja, ba kin shong kyllaiñ myngngor ha madan ïing bad kitei ruh, ki dei ki khyndiat tylli ki rukom kiba pynïapher hapdeng ki Khasi bad ki Dkhar sha ri thor.
Namar kine ki jait jingjia, kin ïai jia na ka por sha ka por, na ka jingïapher ka rukom im bad nangta ka jingbym ïapei ka ïakren ïa khana, kumta ka long kaba donkam shibun eh, ba kito kiba kwah ban trei ïing briew, ban leit sar ïing ha ki hotel ne ki hospital, ba kim dei ban leh shlur ruma, namar ba kin sa ïakynduh ïa kine ki jait jingeh jong ki jingshah lehbeiñ ha ki nongpynïaid jong ki bad nangta la ju lap ba wat ka jingsiew ruh, ka dei kaba rit shibun bad kaba dang lah bha ban ïoh ha Shillong.
Kane ka mat, kam dei shuh, tang ïa ki nongtrei ïing, hynrei ka dei hi kumjuh ïa ki khynnah skul ruh, namar ba kam don jingmut ban phah ïa ki khynnah rit, ba kin leit pule Klas A sha Maharashtra lane sha Karnataka, haba kum kitei ki skul, ki don byllai bah ha la ki jong ki shnong ki thaw bad kiba la ithuh bad la bei pisa pura ruh da ka sorkar lane da ki mission lane da ki dorbar shnong bad kine ki hikai ruh da ka ktien Khasi, katba ka jingleit rah sha ki skul shabar jylla, ka pyni pynban, ba ki kmie ki kpa, kim ñiewkor satia ïa ka ktien tynrai lajong, hynrei ki kwah ïa ki khun, ba kin nang da ka Ktien Tamil lane da ka ktien Kanada.
Kane ka jingleit pule shabar ne leit trei bylla shong ïing ne kiwei pat ki jaitkam ka long pynban kum ka jingkwah rongphong namar ha kaba kut bun na ki Khasi jong ngi ki kut pynban ha ki kam kiba sniew kum ki kam dih drok nangta ka jingiakyrsum lang bad kiwei ki jaitbynriew ri thor ha kaba kiba bun na ki, ki kwah tang ban shu pynjot kai ïa ki thei bad ki rang khasi jong ngi, khamtam eh ba bun na ka jinglong Khasi jong ngi hieng ki khmut khamtam eh haba don kiba ïaroh bad dei hangne ba ha ki snem kiba la leit la ïohi ba ki la don bun ki jingjia kiba pynjah burom ïa ka jaitbynriew Khasi Jaiñtia jong ngi.
Sa kawei pat kadei ka jingshah jrong kti jong ki jaitbynriew Khasi Jaiñtia jong ngi haba ki don shabar na la jylla haba ki leit ban wad ki jingpule ne ban leit bylla naba ki Dkhar sha ri thor ki kheiñ poh bha ïa ngi ki riewlum namar ki kheiñ ba ngi dang dei kiba dangdum ne riewkhlaw, kumta ki kmie ki kpa haba ki ïohi ba ha jylla Meghalaya la jong lah bun kiba biang la ha ka Pule Puthi, ki kam bylla khamtam ka kam ba trei ïing briew, namar kane ka kam mynta kadei kaba la duna bha kiba kwah trei, hynrei ka jingdawa ïa kane ka kam ka long kaba bun bha bad bun na ki longïing ki kwah bad iai wad ïa kum kine kiba trei ban trei ha ki ïing briew.