Naduh ba sdang nga mon sha ka UDP, bym banse ba poi Congress : Auguster Jyrwa

Da ka phareng khyrwit u Bah Kyrmen ha Jaïaw

0

Shillong, Risaw 20: U General Secretary barim ka KSU ha ka sngi Palei u ïathuh ba ka jingpynïasoh jong u sha ka Congress ban ïakhun ïa ka ilekshon MDC ha u snem 2019 ka dei namar ba ka jingbym banse hadien ba ka UDP ka la kyntait ban ai tiket ïa u.
Haba kren ha ka jingïalang pdiang sngewbha sha ka UDP ha Dinam Hall Jaïaw u Bah Auguster Jyrwa u la ïathuh ba naduh ka sngi kaba sdang eh ka mynsiem jong u kam noh satia sha kiwei pat ki party palat ïa ka UDP hynrei hadien ba u la pyrshang ban kynduh ban ki nongïalam jong ka ha shuwa ka ilekshon MDC na ka liang ka UDP ka la kam ba ka la don la ki jong ki briew ban ïakhun ïa ka ilekshon na Jaïaw Constituency.
“Ha kaba sdang, ka kyrteng u Bah Paul kum u kyrtong ban ïakhun ïa ka ilekshon MDC kam mih satia bad ha kata ka por na ka liang jong nga ruh nga la rai ban pan tiket na ka UDP namar nga bad kiba ha ïing baroh ki dei ki nongkyrshan seng riewlum naduh ki snem ba kham mynshuwa eh. Hynrei ynda nga leit ïakren ban pan tiket ki la ong ïa nga ba ki la don la ki jong ki kyrtong kiban ïakhun. Ha ka jingshisha nga la rai ban ïakhun noh kum u kyrtong shimet hynrei ynda ha ïing ki shong pyrkhat kim da sngew ïahap namar nga dei u briew uba dang thymmai donkam ban don ha ki party ba kin ïarap ïa nga ban poi sha ka thong dei kane hi ka daw ba nga poi sha ka Congress,” u la ong.
U la ïathuh ruh ba ha kine ki saw snem kiba la leit kiba u don ha ka Congress um ju hun mynsiem satia namar kaei ka rukom pyrkhat bad ka nongrim kaba la longdoh longsnam kum u dkhot ba u nongïalam barim ka KSU kam ïadei dur satia bad ka nongrim kaba ka party ka don.
U la ong ruh ba ka jingleit pynïasoh jong u sha ka UDP ka dei kum ka jingleit phai biang sha la ka ïing.
Shuh shuh u la ong ba ka dei ka kamram jong ka party baroh kawei bad ka bynta ki nongshong shnong ka West Shillong bad North Shillong ban ïoh bat biang da ki seng riewlum ïa kine ki seat kiba ki la ju bat ha ki snem kiba mynshuwa.
Haba kren ha kane ka sngi u General Secretary jong ka UDP u la kam ba ka jinglong jingman ka saiñ pyrthei ha ka jylla ka dei ka kabu ksiar ïa ka UDP ba kan knieh noh ïa u lakam synshar na kiwei pat ki seng ha ka ilekshon ha u 2023 bad ong ba ka jingpait jingpra ka sem Congress ka party ba khlaiñ bor tam bad ka jingbym pat lah shaniah ki paidbah ïa ka TMC ka dei ka kabu ïa ka UDP namar kumba long mynta dei tang ïa kane ka seng kaba u paidbah u lah ban shaniah.
Ha kane ka sngi la ai jingkren na ki nongïalam jong ka UDP ba kynthup naduh u Bah Metbah Lyngdoh President, Bah Ryngkatlang Lyndem MDC, Dr Aman War kyrtong UDP na North Shillong bad kiwei kiwei ki nongïalam.
La sakhi ruh ba u Bah Kyrmen Shylla President UDP Youth Wing uba long ruh u myntri sorkar jylla u la pyndonkam ban kren da ka ktien pahreng watla baroh kiba wan ïashim bynta ha kane ka jingïalang ki dei ki Khasi.

Leave A Reply

Your email address will not be published.