Shillong, Lber, 19: Kawei ka kynthei kaba la shah rahbor na Dakhin Krishnapur, Assam la ïoh ban pyllait im na ka shnong Umkiang, East Jaiñtia Hills District da ki Pulit ka Assam ha ka sngi Saitjaiñ.
Katkum ka kaiphod ba la ïohlum, ki Pulit ki la ïoh jingtip halor kane ka jingshah rahbor jong kawei ka kynthei na ka shnong Dakhin Krishnapur ha uwei u samla uba la tip kyrteng kum u Suzen Laskar na Sonai, Assam. Ïa une u samla bad ïa kane ka kynthei la ïoh bat na kawei ka Bos hajan Malidor.
Ki Pulit ki la pynlong ka jingtalasi ïa ki Bos kiba kit ïa ki nongleit jingleit hajan Umkiang hadien ba ki la ïoh jingtip shaphang ka jingïaid lynti jong u Laskar bad ka samla kynthei kaba la shah rahbor. Ïa kine ki arngut la pynkit sha Silchar.
Ha kaba ïadei bad kane, ki Pulit ki la register case pyrshah ïa u Laskar hapoh ki kyndon jong ka aiñ.
