Shillong, Lber 19 : U Symbud Myntri Rangbah ka Jylla, Bah Prestone Tynsong u la ong ba ka National Highways and Infrastructure Development Corporation Limited (NHIDCL) ka dang pynkhreh mynta ban aiti noh ha kiwei pat ïa ka jingpyntrei ïa ka kamba la iehnoh shiteng jong ka surok Shillong – Dawki.
“La dep ban khot tender biang na bynta katto katne bynta,” ong u Bah Prestone.
Shuh shuh u la kdew ruh ba katei kam hap satia ha ka jingpeit jong ka srokar jylla naba kadei kaba la peit beit beit da ka Tnad jong ka sorkar pdeng.
“Ka Tnad ka la aiti ïa ka projek ha ka NHIDCL kumta ki don mynta ha ka kam ban aiti noh ïa ka jingpyntrei ha kito ki jaka ba la iehnoh shiteng,” la bynrap biang u Symbud Myntri Rangbah ka jylla.
Dang ha ka 06tarik mynta u bnai, ka Meghalaya High Court ka la bthah ïa ki bor sorkar ban pyntikna baka surok Shillong – Dawki dei ban pyndep noh khlem pynslem shuh da kaba kdew ruh ba ka jingpynheh ïa katei ka surok kan ïarap haduh katta katta ïa ka jylla.
Ka Iing Bishar ka la kdew ruh ba ka jinglong jingman jong ki saw bynta jong katei ka projek kynthup ïa ka surok na Rilbong sha Mylliem Marbaniang kaba don 11.6 kilometer, Mylliem Marbaniang sha Wahlyngkhat kaba don 26.55kilometer, Wahlyngkhat sha Siatbakon kaba don kumba 8kilometer bad nangtei pat sha Wahkdait kaba don 17.77 kilometer bad na Wahkdait pat sha Tamabil Dawki kaba don 7.99 kilometer.
