Shillong, Lber 19: U Symbud Myntri Rangbah ka jylla uba dei peit ia ka tnad Kam Pohïing u Bah Prestone Tynsong ula buhthong ba un ïaleh kat kaba lah ban pynbha ïa ka tnad Meghalaya Police bad ban pynlong ruh ïa kane ka Tnad kaba khuid kaba suba ka ban yn ym don kino kino ki kam jyrsiehne ki jingthohbria.
Katei ka jingkren u Bah Prestone ka dei hadien ba kala don ka jingkynnoh na ka liang u AIG barim ka jylla Bah Gabriel Iangrai uba la kynnoh ba ki don bun bah ki kam jyrsieh ha ka tnad pulit jong ka jylla.
“Mar ïa shimti kum u Myntri ka tnad kam pohïing, nga la lum ïa ka jingïalang bad ki heh pulit ka jylla ban sngewthuh bad ban tip kham bniah ïa ka jinglong jingman jong ka tnad pulit” ula ong.
“Nga la ïohi ïa ka jingkren jong u Bah Gabriel Iangrai, uba la kynnoh ba ki don bun bah ki jyrsieh ha ka tnad pulit, hynrei kum u Myntri Sorkar nga pynthikna ïa ki paidbah ba lada ki don shisha kum kita, ngan ïaleh ban pynkhuid noh ïa ki ba ka Tnad kan ïoh ïa ka jingshaniah na ki paidbah” ula bynrap.
Ha kajuh ka por, u bah Prestone ula pyntip ba ka sorkar jylla kan ïaleh ruh ban pynkhlaiñ noh ïa ki Border Outpost jong ki pulit kiba don ha ki thaiñ khappud bad ka jylla Assam khnang ba yn lah ban ai ïa ka jingïada bad jingshngaiñ ïa ki paidbah nongshong shnong ka jylla.
“Ngin pynkhlaiñ ïa ki Border Outpost kiba la don lypa, da kaba thung ar shah ïa ki pulit bad nga lah dep ban bthah ban pynkhlaiñ noh ïa baroh ki Border Outpost khamtam ha ki jaka kiba don ka jingïakajia pud” la pynkut u Bah Prestone.
