Shillong, K’lyngkot, 24: Kawei ka trok kaba kit ïa ki iit kaba don ïa u Nombar TN 52- F-5863 ka la ryngkang na surokbah sha phyllaw iing jong ki briew ha ka step sngi Balang ha ka shnong Mawblei ha ka jaka ba long khongdong bha.
La antad ba ka jingjylliew jong ka kynjang na surokbah sha ka jaka ba kane ka trok ka la hap ka long kumba 100 phut tam eiei.
Katkum ka khubor ba la ïohlum la ïathuh ba u nongñiah jong ka trok u la khladnoh hashen bad u nongbud ruh u la mynsaw jur.
Kane ka trok ka la pra phum bad ki iit ba la thep hapoh ka trok ki la orpait lyngkhot lyngkhai.
Kane ka jingjia ka la pynher syrngiew ïa ki briew kiba shong basah hajan ka jaka ba kane ka trok ka la hap.
Ki Pulit ka Madanryting PS tang shu ïoh jingtip halor kane, ki la leit ban ai jingïarap ban ïoh sei ïa ka met jong u nongñiah bad ban pynkit noh sha Shillong Civil Hospital ïa u nongbud uba la mynsaw jur.
