Shillong, Nailur 24 : Ka MLFC Lawsohtun ka la ïoh ban khur ïa ka song pisa kaba 30hajar tyngka ryngkat ki trophy hadien ba ka la ïoh ban pynliem noh ïa ka All Stars FC na Mawlai ha ka jingïaknieh ïa ka nam lahduh jong ka Inter Club knockout FT kaba long ha ka janmiet sngi U Blei ha Lawsohtun.
Ha katei ka jingïalehkai kaba mar 6 ngut kaba la pynïaid da ka kynhun Shi Paralok, ki la don haduh 56 tylli ki kynhun na kylleng kiba la wan ban shim bynta.
Haba phai sha ka jingïalehkai, ka MLFC tang ha ka kylla step ka la ïoh ban thep haduh lai kol, katar ar kol na u O Lyngshiang bad shi kol na u P Suting, bad kumta tad haduh ban da kut ka kylla, ka la ïoh ban lamkhmat da 3-0 kol.
Dei ynda la poi ka kylla miet ba ka All Stars ka la ïoh ban pynphai lem shi kol lyngba u Daman Pathaw kaba pynlong artad ïa ka jingïakhun ban kut da 3-1 kol. Kumta, ka All Stars kaba wan ba ar ha katei ka lympung ïalehkai mar 6 ngut ka la ïoh ïa ka khusnam pisa ba 15 hajar tyngka ryngkat ka trophy.
La pynhap pyrda ïa katei ka lympung da u MDC ka thain Bah Mitchel Wankhar kum u Kongsan ryngkat ka jingdonlang u Rangbah Shnong Bah Haribert Rynjah nalor ka jingdonlang kiwei ki nongïalam shnong bad ki paidbah nongpeitkai.
