Mawkyrwat, Jylliew 21 : Ki 54 ngut ki briew kiba don ka jingduna ha ka bor ïohi ne ki khmat ne ki visually impaired hynin ka sngi ka 20 tarik u Jylliew, 2024, ki la ïoh ki jingmyntoi lyngba ka jingïoh jong ki u diengduh ne u Shaarthi Smart Cane ba la ai lyngba ka Corporate Social Responsibility (CSR) jong ka Indian Railway Catering and Tourism Corporation (IRCTC) ha ka jingïalang kaba la long ha Auditorium Hall jong ka Nativity Higher Secondary School, Mawkyrwat.
Ïa ka program la pynlong da ka Corporate Social Responsibility (CSR) jong ka Indian Railway Catering & Tourism Corporation (IRCTC) ryngkat ka jingïatreilang ka State Resource Centre on Disability Affairs (SRCDA), Shillong bad ka District Social Welfare Office, South West Khasi Hills District, Mawkyrwat ha kaba u Dr. N.P. Laloo, MS Ortho, Project Director and State Coordinator, State Resource Centre on Disability Affairs, Civil Hospital, Shillong u la long kum u kongsan.
Lah ban kdew ba ïa u Shaarthi Smart Cane la noh synñiang ne bei tyngka da ka Indian Railway Catering and Tourism Corporation (IRCTC) lyngba ka jingpyntreikam jong ka Torchit Company ban ai ki lad jingïarap ei ïa ki briew kiba don jingduna ha ki khmat bad ha ka jinglamkhmat mynta ka sngi da u Hunny Bhagchandani uba dei u CEO & Founder of Torchit Company, Ahmedabad, Gujarat.
U Dr. N.P. Laloo, MS Ortho, Project Director and State Coordinator, State Resource Centre on Disability Affairs, Civil Hospital, Shillong haba kren kum u kongsan la ai jingïaroh ïa ka Indian Railway Catering & Tourism Corporation (IRCTC), ka Blind People’s Association (BPA) bad Torchit Company, kaba long ka daw bah ban kyrshan ne noh jingïarap ïa ki briew kiba don jingduna ha ki khmat. Shuh shuh u la kren ruh khyndiat halor ka jingthmu jong kane ka prokram, da kaba ong ba kam dei tang ka prokram jong ka jingïarap na ka bynta jong ki hynrei ka dei ruh ka bynta jong ka jinglehkmen ban pynkup bor ïa ki da kaba pyni ba ka don bynta lang ka ai ka jingkyrmen bad u Shaarthi Smart Canes u long tang u atiar ban kdew lynti ïa ki ba kin lah ban ïeng ha la ki jong ki kjat, ka jingngeit skhem bad ka jingshaniah bad ka lawei ba phyrnai ïa ki briew kiba don jingduna ki bor ïohi.
“Watla ka don ka jingpynwit, ka lad ban im ha ka imlang ka sahlang ruh ka don, ïa ki baroh ki ban ïoh ïa u Shaarthi Smart Canes bad kane ka sngi ka dei ka jong ki bad to tip ba ki don ka bor bad ïeng skhem ha ki jingmut jingpyrkhat bad ha ki kam ba ki ki trei katkum ka jingkwah ha ka jingim jong ki”, u la ong. Namarkata, u don ka jingkyrmen bad lyngba u Shaarthi Smart Canes ki briew kiba don jingduna ha ka bor ïohi kin sa ïoh shisha ki jingmyntoi ha ka jingïaid lynti ha jingim jong ki kaba manla ka sngi ha ka jingsuk bad jingsngewshngaiñ. Shuh shuh u Shaarthi Smart Canes u long ruh ka dak jong ka jingburom ïa kito ki briew kiba donkam jingïarap bad ai ka jingmynjur ba ki don ka jingïatreilang ban ïarap iwei ïa iwei pat. “To ngin bteng ïa ka jingïatreilang da ka mynsiem jong ka tylli bad jingieit, ban tei ïa ka imlang ka sahlang kaba khlaiñ, kaba kynthup lang ïa baroh bad kaba shongsuk shongsaiñ”, ong u Dr. Laloo.
U Hunny Bhagchandani, CEO & Founder of Torchit Company, Ahmedabad, Gujarat ha ka jingkren jong u u la ai katto katne ki jingbatai ha kaba ïa dei bad u Saarthi Smart Canes da kaba ong ba une u diengduh u dei uwei na ki tiar ba lah ban pyndonkam, uba duna dor, uba neh slem, bad uba bha bad u ban neh haduh 100 kynta lada pyndonkam ïa u hadien ba la dep ban ai ai bording ne charge. U la batai ruh ba ïa une u Saarthi Smart Cane ki lah ban pyndonkam ha kaba ïaid ha ki jaka ba long madan, ba long lum bad ha ïing ruh namar ha u ki la buh ïa ka kor ne u sensor ba lada don ki jingthut, ne don ei ei ba wit ha khmat u pyni da kaba don ka jingkhih ne vibrate ha u jingbat. Ha kajuh ka por u la pyntip ruh halor ka Jyoti – AI Smart Eye Glasses, kaba dei ka app ba thymmai ban long ka jingïarap na ka bynta ki briew kiba don jingduna ha ki khmat ne visually impaired.
Kiba la wan lang ha kane ka program ki long u bah Dylan R.J. Syiem, State Nodal Officer, Unique Disability ID, Project State Resource Centre on Disability Affairs kum u symbud kongsan, u Swama Khobung, Ch, Supervisor, bad u Himangshu Bezbaruah, Associate na ka Indian Railway Catering and Tourism Corporation (IRCTC), u Hunny Bhagchandani, CEO & Founder of Torchit Company, Ahmedabad, Gujarat bad u Prem Katar, Impact Officer na ka Torchit Company.
Kiwei de ki kynthup ïa u Dr. W. Sutnga, Medical Superintendent jong ka Civil Hospital Mawkyrwat, u bah D.G. Nongsiej, Incharge District School Education Officer (DSEO), South West Khasi Hills District, Mawkyrwat, u bah Paul M. Wahlang, District Child Protection Officer (DCPO), South West Khasi Hills District, Mawkyrwat bad u bah R.R. Lyngkhoi, Myntri Shnong Mawkyrwat ryngkat ki kmie ki kpa jong ki khynnah kiba don jingduna ha ki dkhot met lem bad kiba ha ïing ha sem.
