Na ka T. 768 klur sha ka T.22,000 klur kiew ka jingïoh kurup drok ha India

Shillong (PIB): Ka jingpynjur ka thma pyrshah ïa u drok da ka sorkar pdeng ka la paw ha ka jingkiew ka jingïoh kurup drok ha kine ki 20 snem tam.
Katkum ka jingïathuh u Myntri Sorkar Pdeng ba dei khmih ïa ki tnat Kam Pohiing bad Cooperation, u Amit Shah u la ong ba hapoh ka jingïalam jong u Myntri Rangbah Duh, u Narendra Modi, ka polisi ‘zero tolerance’ ne bym don jingmap satia pyrshah ïa ki drok ba la shim da ka tnat Kam Pohiing ka la ïoh ïa ki jingjop mynta. Ïa kane lah ban ïohi na ka jingkiew ha ka jingïoh kurup drok naduh u 2006 haduh 2013 ka long 768 Klur tyngka, katba naduh u 2014 haduh u 2022, la ïoh kurup haduh 22,000 klur tyngka, ka jingkiew kaba haduh 181 Percent.
Kadei kadei ka khubor jong u Amit Shah ha ka jingpynpaw “International Day against Drug Abuse and Illicit Trafficking”, mynta ka sngi.
U Myntri u la ong ba ka sorkar kan nym shah ïa ka jingdie ïa ki drok ha India, bad yn ym shah ïa ka jingkit ïa ki drok sha kiwei kiwei ki bynta ka pyrthei lyngba ka India. Ha kane ka thma pyrshah drok, baroh ki agency jong ka ri, khamtam ka “Narcotics Control Bureau” ki dang bteng ïa ka jingiakhun. Ban pynkhlain ia kane ka jingïakhun ka tnat Kam Pohiing ka la seng ïa ka NCORD ha u 2019 bad la seng ruh ïa ki Anti Narcotics Task Force (ANTF) ha ki tnat pulit jong baroh ki jylla.
Shuh shuh, u Shah u la ong ba ka thma pyrshah ïa ka jingpyndonkam bakla bad ki jingktah jong ki drok ka dei kaba dang ïaid shakhmat ha ka ri lyngba ki rynsan bapher bapher. U Myntri u la ong ba ha kaba ïadei bad ka jingpynduh ïa ka jingthung ïa ki drok ne ka jingpynsaphriang jingtip, ka tnat Kam Pohiing ha ka jingiatreilang bad ki kynhun bad ki jylla bapher bapher, ka dang leh ïa kaba donkam ban pynlong ïa ka India kaba lait na ki drok, hynrei yn ym lah ban ïoh ïa ka jingjop khlem ka jingïashim bynta jong ki paidbah.
U Myntri u la kyntu ruh ïa ki nongshongshnong ka ri ba kin kiar na ki drok bad kin ïada ïa ki longiing jong ki na ki drok. “Ki drok kin pynjot ïa ki samla bad ka imlang sahlang bad ka pisa ba kamai na ka jingdie ïa ki drok ka dei kaba pyndonkam pyrshah ïa ka jingshngaiñ ha ka ri”, la ong u Myntri.
U Amit Shah u la ong ba u ngeit skhem ba lyngba ka jingiatreilang, ngin sa lah ban weng ïa kane ka jingeh kaba wan na ki drok bad kot sha ka thong ban don ka India kaba lait na ki drok bad u ai khublei sa shisien ïa ka NCB bad kiwei kiwei ki kynhun kiba la nohsynñiang ban trei na ka bynta ka thong jong ka Sorkar bad nga kyrmen ba ngin ym shongthait haduh ngin da ïoh ïa ka jingjop ha kane ka jingïakhun pyrshah ia ki drok.