Na ka kam shakri ïing briew sha ka kam shakri paidbah

Shillong, Risaw 04: Ka lympung saiñpyrthei ha ka elekshon, ym tang ba kan ïpohi ïa ka jingmih ki briew kiba la shakri ha ki kam Balang, hynrei kin don ruh ki briew kiba la ju shakri ha ka kam bylla ha ki ïing briew.
Iwei na kine idei i Kong Wanpynhun Kharsyntiew, ka longkmie kaba ym tang ba ka la shakri kum ka Samla ha ki ïing briew, hynrei ka la ïalam ruh ban ïakhun ïa ka hok ki nongbylla ïing briew, ki nongbylla misteri, ki nongbylla ha ki ophis sorkar, ki nongbylla kam ñian kali ruh.
I Kong Wanpynhun, idei iwei na ki longkmie kiba ym shym la ailad ba ka jinglehraiñ kan jop ïa i, haba i hadien ba i la pyndep ïa ka jingpule ha ka Graduate i la kyrshan ïa ka ïing ka sem da kaba leit bylla ha ïing briew tad haduh ba in da khreh ban ïaleh ïa ka eksam Master of Social Work. Namar kane ka jingïadon bynta jong i bad kine ki jaitkam, ki nongseng ïa ka kynhun nongbylla ïing briew ba la tip kum ka ‘North East Domestic Workers Movement’ ki la khot noh ïa i ban shimti ïa ka kam nongïalam ban ïakhun ïa kiba bun ki hok jong ki nongbylla ne ki nongtrei kiba hap ha kata kaba ki ong ka unorginised workers.
Hadien ka jingïakhun kaba la neh kumba 20 snem ïa ka hok jong ki nongbylla bad ki briew kiba duk, i Kong Wanpynhun iba shong ba sah ha Malki, mynta i la pynkhreh ban ïakhun ban pynïoh ïa ka hok jong ki lyngba ka jylli jong ka saiñhima.
“Nga sngew ban ïakhun da ka lynti kaba ngi la ïakhun mynta la arphew snem ban pynïok ïa hok ki nongbylla kam dei kaba suk bad dei tang da ka lynti ban ïoh long nongmihkhmat kadei ka lynti kaba kham biang”, i la ong haba ïakren bad u nongthoh khhubor.
I Kong Wanpynhun ym tang ba i ïalam ïa ka kynhun ha ka jylla ne ka thaiñ shatei lammihngi, hyntrei i ïadon bynta ruh bad ka National Movement, ha kaba i la leit ïashim bynta ruh ha ki International Meeting kiba la long ha kiba bun ki ri ka pyrthei.
I la ïathuh ba naduh ba ka synshar ka Seng Congress ki la rah ïa ki jingeh jong ki nongbylla kum ka Minimum Wage, ha kaba ka sorkar ka la pyntreikam ïa ka dor bai byla jong kito kiba ju bylla wat ha ki ophis sorkar ruh kumjuh. Nangta ki la ïakhun ruh ïa ka hok na ka bynta kito kiba dei hok ban ïoh khaw reshon, kiba dei hok ban ïoh ïa ka umbam umdih, ka ding elektrik bad kiwei kiwei de ki jingdonkam kum ki briew.
“Phin sngewlyngngoh ba ha ka Constituency ba nga, nga shong nga sah, ki dang don ki briew kiba ym pat ïoh satia ïa ka umbam umdih ne wat ïa ka ding elektrik ruh”, i la ïathuh.
Nalorkata i la ong ba kadei ka kamram jong ki Nongmihkhmat ban peit ba ym tang ba ki paidbah kin ïoh lad ban leit shah sumar ha ki Hospital sorkar, hynrei kidei ruh ban ïoh ïa ka jingsumar kaba biang, naduh ka jingsumar na ka liang ki Doktor, ka jingbiang ki dawai dashin, ki jaka thiah kiba ki nongpang kidei hok ban ïoh.
I la pynpaw ruh ba ban rat diengkhong ne ban pynduh ïa ka jingduk jingkyrduh kam dei da kaba ki paidbah kin shim ne ïoh pisa ha ka por elekshon, hynrei kadei lyngba ki Polisi ha kaba suki suki lada don lang ryngkat bad ka jingsynshar kaba khuid, kane ka jingdiuk jingkyrduh kan jah noh na ki paidbah.
“Kumba long mynta ym don ruh iwei i nongmihkhmat ki ban sngewthuh ïa kine ki jingeh jong ki paidbah bad kiban ïakren na ka bynta jong ki ha ïingdorbar ne ha ka sorkar kaba synshar ruh”, i la ong bad dei namar kane ka daw ka la pynlong ïa i ban mih shakhmat ban ïakhun ïa kane ka elekshon 2023 na East Shillong pyrshah ïa i Kong Ampareen Lyngdoh, ka MLA ba la jop lynter naduh u 2008 bad ïa kiwei kiwei de ki Kyrtong.
Shuh shuh, i la ong ba ha ka jingïakhun elekshon, lada ki paidbah ki wan shakhmat ban ïatreilang lah ban ïaleh pyrshah ïa ka bor jong ka pisa. I la kynnoh ruh ba kadei ka jingpynmlien jong ki kyrtong hi ban ai pisa ba ki paidbah ki sa mlien ban pan pisa por elekshon. “Ka long kum ba pynbieit ïa ki khunlung da ka mobile ba kin bam ja ne ba kin khreh kot bad ynda ki la mlien da phim ai kim treh ban bam ja ne ban khreh kot”, i la ong.