Shillong, Jylliew 19: Ki dkhot ka Shillong Sports Association, hapoh ka jingïalam u President ba thymmai ka synjuk, kata u Bah Banteidor Lyngdoh ha ryngkat u Chief Engineer jong ka State Sports Council ka Meghalaya bad u contractor ki la leit ban jurip ïa ka SSA Stadium -First Ground, Polo, hynne ka Sngi Balang hadien katto katne sngi ba bteng ka jinghap slap.
Ka nala pyntuid um (drainage) ha kane ka madan ka la long ka jingthut naduh ba la siang thymmai ïa u phlang plastik (artificial turf) ha u snem ba ladep.
Haba phai dien, ka Sorkar jylla lyngba ka SSCM, ka la wan shakhmat ha ka ban pynïoh phlang plastic hadien ka jingpyrshang ban siang da ki phlang ba shisha (natural grass) ha u snem 2017, hynrei lyngba kane ka jingleit jurip, ka kynhun ka la sakhi hi dala ki jong ki khmat ïa ka jingpyn trei torti ban siang ïa u phlang plastik ha kane ka Stadium.
Ka jingbteng jong u slap ban hap ka la nang pynpaw ïa ki dak ki shin ha kaba bun ki bynta ha katei ka madan ki la lang um namar ka jingbym biang ki jaka pyntuid ïa ka um khamtam mynta ha ka por lyuir ba jur ka jinghap slap.
Hadien kane ka jingleit jurip, na ka liang u President ka SSA- Bah Banteidor Lyngdoh u la pynpaw ba ka synjuk kam shym la hun ïa kane ka jingpyntrei namar ka jingduna bad lang um ha katto katne ki bynta jong ka madan.
Shuh shuh, u la bynrap ba ka SSA kan sa phah da ka jingthoh sha ka SSCM ban thaw ïa ki lad ban pyndep ïa ka ha ka por kaba biang khnang ba kan nym ktah ïa ki lympung ïalehkai ba ka SSA kan sdang.
Lah ban kdew ba ka lympung ïalehkai U-20 Fourth Division kan sa sdang shen bad na ka liang jong ka synjuk kam kwah ban pynslem ne pynkynriah ïa ki jingïalehkai tang namar kane ka daw.
U Bah Banteidor u la ïathuh ba na ka liang jong ka SSCM bad u contractor ki la kular ban trei sani bha ha kaba ïadei bad ki jaka pyntuid ïa ka um khnang ba lada jur u slap kan nym don jingthut ïa ka madan.
Nalor kane, u Bah Bantei u la pynpaw ruh ba shen ka rynjuk kan sa leit ban ïakynduh ïa u Myntri Rangbah ka jylla ban ïakren halor ka mang tyngka na bynta ban pynïeng ïa ka jaka shong paidbah (Gallery) kaba don sha ka liang ka Wah Umkhrah.
