Kan long ka sien kaba ar kaba ki paidbah ka rilum Jaiñtia khatam ha East Jaiñtia Hills District kin pynlehraiñ ïa ka Sorkar Meghalaya Democratic Alliance (MDA) bad ïa ka National Highway Authority of India (NHAI) namar ka jingjot jingpra kaba la isaitmet jong ka surok ha rilum Jaiñtia. Ki paidbah ka rilum Jaiñtia bad ki paidbah na kiwei ki jylla ka thaiñ Shatei Lammihngiki khñium ïa ka jingjot rathai jong ka surok National Highway-6. Ki paidbah ki kynnoh ba ka dei beit ka jingtrei torti jong ki kompeni ba ïohkam kontrak na ka National Highway Authority of India (NHAI) namarba ka jingjot jong ka surok ka la long kaba shyrkhei.
Haba bishar ïa ka jingjot jong ka surok National Highway-6 kaba pynïasoh ïa ka sor Jowai shaduh Ratacherra ka shnong kaba don ha khappud ka la buh jingeh haduh katta katta. Haba peit ïa ka jinglong jingman jong ka surok, ha ka thaiñ Sonapur ruh kane ka surok la shem ba ka la buh jingeh bha ïa ki nongleit nongwan namarba kane ka surok ka dei ruh u budlum jong ka kit ka bah bad ka rah ka rong bad khamtam eh ka dei ruh ka surok kaba pynïasoh bad kiwei pat ki jylla kiba don ha kane ka thaiñ Shatei Lammihngi bad ka jylla Meghalaya.
La shem ruh ba ka jingsniew shaba palat jong ka surok National Highway NH-6 na Jowai sha Ratacherra ka la dap mynta satang da ki ki thliew ki syar ha shilynter jong ka surok kaba la kot sha ka 10-15 kilo miter ki bynta ba sniew jong ka surok.
Ka jingther jong u lapbah uba jur mynta u snem ka la nang pynshong synjor shuh shuh ïa kane ka surok bad kaba buh jingeh bha ïa ki kali heh bad ki kali rit kiba ïaid lyngba kane ka surok namar ka jingpra jong kane ka surok kaba ju lang um ruh ha ka por ba jur bha u slap. Dang ha ki khyndiat taiew ba la leit noh kane ka surok ka la shlei da ka um kat haduh ba ki kali kim lait shuh ban ïaid. Mynta sa ka jingtwa jong ka surok ha Lumshnong ka la pynsyier mynsiem ïa ki nongleit nongwan kiba ïaid lyngba ïa kane ka surok ban leit sha ki shnong bad ki jylla bapher bapher ka thaiñ Shatei Lammihngi.
Mynshwa, ka East Jaiñtia Hills Driver Association (EJHDA) ka la dawa ïa ka National Highways Authority of India (NHAI) ban sangeh noh jingkhrong pisa na ki ar tylli ki ‘Toll Plaza’ kiba don ha ki bynta jong ka surok kata ha Ïalong West Jaiñtia bad kumjuh ha Lumshnong East Jaiñtia Hills Distrcit ka long kaba shongnia namarba haduh mynta ka jingïoh lum pisa jong ka NHAI na ki kali kiba ïaid lyngba kane ka surok ka long da ki phew lak ne klur ha ka shibnai. Hynrei haduh mynta kam don pat ka dak ban maramot ïa ka surok kaba la sdang ban jot suki pa suki.
Mynta pat sa ka Joint Action Committee Dong Namchiang, East Jaiñtia Hills District ka la khot syndon da ka pakhag surok kaba khlem pud sngi ban pynpei skhor ïa ka Sorkar Jylla bad ïa ka NHAI namarba ki paidbah ki la mad ïa ka jingsyrtok kaba khraw na ka jingjot jingpei thliew kaba la long shaba palat pud jong ka surok.
Ka Sorkar Jylla ka la dei ban tuklar mardor halor kane, namar lada ka Sorkar kam tuklar khlempep ka jingjot jong kane ka surok ar laiñ kan nang jur shuh shuh sa ha kiwei pat ki bynta.
Lada ka surok ka jot ka pei, hato ka shonghok mo ïa ka NHAI ban lum pisa na ki kali kiba ïaid lyngba kane ka surok bad kumjuh ruh la shem ba ka jingjot jong ka surok ka long naduh u pud uba pynïaphiah ïa ka East Khasi Hills bad ka West Jaiñtia Hills? Ki sengbhalang ha rilum Jaiñtia la bunsien ki la pynibor ban khang khyrdep ïa ki khyrdop khrong pisa ka NHAI namar ka jingbym lah ban syrdep ïa ka jingjot jong ka surok.
Ka NHAI mynta ka ïohdaw ba ka dang dei ka aiom slap hynrei lada ki bor ba dei peit jong ka NHAI ki ïohi shisha ïa ka jingeh jong ki paidbah naduh ka aiom tlang ba ladep ki la ban syrdep noh mardor ïa ka surok National Highway-6 bad mynta u snem la sakhi ba ka jingbym leh eiei jong ka NHAI ka jingpra jong ka surok ka long arshah ban ïa kaba long ha ki snem ba ladep namarba ka jingïaid jong ki kali heh kiba haduh 10 shaka, 12 shaka, 14 shaka bad 16 shaka ka la nang pynjulor shuh shuh ïa ka surok bad khamtam ïa ki bynta kiba la julor bad kiba la sniew lypa.
