Na ka jingjia ha wei Sawdong, ka dei ka jingsneng ïa ka tnat shangkai pyrthei bad ka jylla baroh kawei

Ka ju don ka kyntien kaba ong “once bitten, twice shy” lane wei haba la mad shisien, dei ban da shyit tyngeh ïa la ki shkor, ban nym jia biang sa shisien bad kitei ki kyntien, ki dei ban ngam sha tynrai dohnud jong kiba pynïaid ïa ka kam shang pyrthei ha Sohra, ha Dawki, bad kumjuh ïa ka tnat shang pyrthei ha ka jylla hi baroh kawei.
Ka jingjia halor ka jingïap jong U Raja Raghuvanshi, ka la thad madan ïa ka thaiñ Sohra baroh kawei bad kumjuh ïa ka jaitbynriew Khasi hi baroh kawei, ha kaba u hynmen jong U Raja, ula kynnoh beit beit ba ki pulit ka jylla, ki buhrieh ïa ki nongpynïap ïa U Raja bad nangta sa ki kotkhubor lem bad ki telebishon ka India, kiba ju isih bad ibeiñ ïa u paidlang ka ri Khasi, ki la kynnoh, ba ki nong Meghalaya, ki dei kiba pynïap briew, kiba bam dohbriew bad kumta ka ïing U Raja, ka dawa jur, ban phah tohkit sha ka CBI, halor kane ka jingjia, ha kaba kim salia ban thad madan, da kaba thoh sha u Myntri Rangbah duh ka India, ha kaba wat u Myntri Rangbah ka jylla Madhya Pradesh, u dawa hi ïa ka jingtohkit jong ka CBI.
Hangne ka don ka mat kaba shai bha bad kata ka long, ba kiba nabar, ki jied tang ïa ka jingbang, katba ynda ki la jlep, ki sa iehnoh bad leit phai sha la ïing bad katei kam dei tang ïa ka jaka shangkai, hynrei ïa ki par mawshun bad wat ïa ki kynthei ruh. Ym tang katta, hynrei haba ki biang ïalade, ki ai jingïaroh, katba tang shu la bakla tiak, sa ka beiñ bad ka rhah bad kitei ki dei ki jingshisha, kiba hikai ïa ngi, ba ngin long kiba adkar bad kiba husiar bha.
Kat haduh mynta, ba ngim pat ju mad ïa kino kino ki jingeh, kumta ngi la ailad than ïa ki briew kiba nabar bad ngim tip, la ki dei kiba wan kai ne kiba wan thap tuh, ne kiba wan buhai shnong bad ha ki khep ki khep, ma ngi ki trai shnong, ngi la kylla long noh, ki nongshah ïalam ha kine kiba wan shangkai, namar ba ki la ïalam lut ma ki bad ïa kata ngi ïohi, ba kam don shuh kawei ka surok rit ne surok shnong, kaba kim tip ban rung ban mih, kam don shuh kawei ruh ka jaka shangkai kaba kim ïa rung ïa mih, ïa bret jaboh jabaiñ bad ba ki trai jaka, kim ïoh bainong satia wat tang shi saphit na kitei kiba shu rung katba mon.
La ju ïakren ïa ka jingteh lakam ka Sikkim ïa kiba leit kai sha katei ka jylla bad hangne ruh ka dei ban don noh ka aiñ kaba shai bha, ha kaba ki kali kiba nabar, ki lah ban ïeng ha kano kano ka jaka, lada dei ha Umïam, lane ha Mawïong lane ha Polo bad ka dei ka kamram jong ki trai shnong, ba kin ïalam ïa ki bad sa leit on biang sha kajuh ka jaka, ba ki shimti bad katei kan ai kamai ïa ki trai shnong bad kumjuh kan ai jingshngaiñ ïa ki nongleit shangkai.
Ki briew kiba nabar, tang shu ïohi ïa ki madan phlang, ki la ïap beij haduh ba kim nang shuh ban pyrkhat ïa la ka jingim, nangta tang shu ïohi ïa ki pung kiba shngiam bad kiba khuid khlir khlir, nangta tang shu ïohi ïa ki riat kiba jylliew bad kiba shynna bha bad tang shu la rung sha ki shnong kiba khuid bad dei ïa kum kitei ki jingleit, ba ka donkam ïa ki trai shnong, ba kin ïalam lynti, sha ki jaka kiba shngaiñ, ki jaka kiba kham suk ka ïaid ka ïeng bad ki jaka kiba biang ka bam ka dih, ka shong ka sah bad kumta ter ter.
Kane ka jingjia ba shah pynïap jong u (L) Raja Raghuvanshi kadei ban long shisha ka nuksa kaba donkam tam ïa ngi ki jaitbynriew Khasi Jaiñtia kiba don barabor ïa ka mynsiem ban kham ieid bad sngewjan ïa kiba nabar shnong ne bar jylla bad ban leh mynleh pat ïa la ki jong ki paradoh parasnam la ka long ha kano kano ka rukom la ka dei ha ka kam khaïi, pateng, ka kam ïoh kurim, ka kam ïadei paralok ne kiwei kiwei pat ki jingïadei naba uba nabar Hi u shu ibang beit tang ïa ka bam ka sa hynrei un da la lap pat ba la shu shet kajuh shi kajuh un sa lap la ngiah namar ka jinglong briew ka ïapher shibun na uba ju mlien ban ban musla bad kito ki bym kwah satia ba ka jingrah kan sma musla kumba long kiwei ki jaitbynriew, hynrei tangba la bang mluh ka la biang ban mad ïa ka jingbam.