Na ka jingïalap rad dynkhong ïa ka jingpang TB, sam jingbam ban kyrshan ïa kiba pang TB ha Ri Bhoi

Nongpoh, Naiwieng 20: Kum kawei na ka thong ban dang ai jinghikai sha ki paidbah ka them Ri Bhoi ba kin wan shakhmat ban ïa trei lang na ka bynta ban pynduhjaid ïa ka jingpang TB, ka ophis ka District Tuberculosis officer Ri Bhoi ryngkat ka jingïatrei lang bad ka Nezone Pipes & Structure NTL Steel ki la pynlong ïa ka prkram ai jinghikai sha kiba pang TB bad ruh ban sam ïa ki jingbam na ka bynta ban kyrshan ïa kito kiba pang TB ha Ri Bhoi.
Ïa kane ka prokram la pynlong ha phyllaw ka Civil Hospital Nongpoh, ha kaba ka Company, Nezone Pipes & Structure NTL Steel ka la dei kawei na ka Company kaba mih shakhmat ban kyrshan da ki jingbam na ka bynta kito kiba dang shah sumar ha ka jingpang TB katba ki dang don ha ka jingsumar jong ki doctor.
Ha kane ka prorkam la wan shim bynta ruh naduh ka District Medical & Health Officer ka Ri Bhoi, ka Dr. TS. Momin, ka District tuberculosis Officer, ka Dr. E. Kalwing, u Director ka Nezone Pipes & Structure NTL Steel, u Yash Agarwal bad kynthup ruh naduh kiwei ki doctor, ki Nurse bad ki nongpang TB kiba la wan ban shim bynta ban ioh pdiang ïa kitei ki jingbam.
Kum ban pynkynmmaw, kane ka prokram ba la pynlong ka dei ruh kawei na ka thong jong ka Pradhan Mantri TB Mukt Bharat Abhiyan (PMTBMBA), kaba dei ka thong ban pynduhjaid noh ïa ka jingpang TB naduh u snem 2025 ba la buh thong da ka sorkar kmie.
Ka Tuberculosis Officer ka Ri Bhoi, ka Dr. E. Kalwing, ka la kren ruh ha kane ka snig ba ka thong jong kane ka prorkam ka long katkum ka thong jong ka Pradhan Mantri TB Mukt Bharat Abhiyan (PMTBMBA) ba ka sorkar kmie lyngba ka Ministry ka tnad Health and family welfare ki buh ïa ka thong ban pynduhjaid noh ïa ka jingpang TB naduh u snem 2025 bad ban pynduhjaid ïa kane ka jingpang donkam ban don ka jingïatrei lang na baroh ki liang.
Ka la ai khublei kyrpang ruh ïa katei ka Companay kaba la tyngkun haduh 10 ngut kiba pang TB ban pynbiang ïa ki jingbam katba ki dang don ha ka jingsumar bad ka kyrmen skhem ruh ba kiwei kiwei kiba don mynsiem ban ïatrei lang kin mih shakhmat ban ai trei lang na ka bynta ban pynduhjaid ïa ken ka jingpang TB ba ka sorkar ka la buh thong ban pynduhjaid ha ka ri bad kum ka Officer ka khot ka wer ruh ïa baroh ki paidbah ka District bad ka jylla hi baroh kawei ba ngin lah ban pynduhjaid ïa kane ka jingpang TB, ka la bynrap.