Nongstoiñ, Risaw 2: Ka jingbuh ïa ki speed braker haduh hynriew tylli ha kajuh ka jaka ha ka surok bah National Highway 44 (E) Shillong Tura, ha ka bynta shuwa ban poi ha ka jaka ba khongwaiñ bha ha Jeidohkroh ban ïada na ka jingkylla lyndang jong ki kali, ka la ïarap shibun bad naduh ba la shna ïa kitei ki speed braker ym ju kham don shuh ki kali kiba kylla lyndang ha katei ka khongwaiñ.
Kaba sngewsih ka long pat ba watla ki kali ki la lait na ka jingkylla lyndang ruh, hynrei ka jingïatynrah kali pat ka jur bha ha katei ka jaka. Naduh ba la buh ïa kitei ki speed braker ha katei ka jaka tang kiba la ïoh jingkheiñ kat haduh mynta ka sngi ki la palat ïa ka sanphew tylli.
Napdeng ki kali kiba ïatyngkhuh ha katei ka jaka ym pat don ki kali kiba kiew na Nongstoiñ, hynrei ki dei ki kali kiba hiar na ki shnong kiba don shaphang mihngi ter ter naduh Umlieh, Markasa, Kynshi, Mairang haduh Shillong.
Ha ka step jong kane ka lah sngi u Blei, ka jingïatynrah kai ha katei ka jaka ka la jia biang ha kaba kawei ka Tourist Taxi kaba don ïa u registration number AS 10C 7733 kaba mih na Shlliong, kaba thmu ban wan sha Nongstoiñ ka la tynrah na shadien ïa kawei ka kali Wagon R kaba don ïa u registration ML 05F 7977, ha kaba katei ka tourist taxi ka la julor jur bha bad katei ka Wagon R kaba shah sangah na shadien ruh ka la julor bha.
U nongñiah jong ka tourist taxi u la ong ba namar ba um pat ju wan sha Nongstoiñ, um tip satia ba don speed braker bad katei ka Wagon R kaba ïaid sha khmat haba la poi ha katei ka jaka, ka la pynsuki noh bad dei na kata ka daw ba u la kum sangah ïa katei ka kali na shadien.
U bah E.Khardewsaw u ba ñiah ïa katei ka Wagon R pat u la ong ba um shym poi pyrkhat ba u nongñiah ïa katei ka tourist taxi, um tip ba don speed breaker bad u la ïohi ruh na ka side glass ba katei ka tourist taxi ka la poi ha jan hynrei um lah leh ei ei shuh namar ka dei na kajuh ka lain.
Watla ka jingjulor jong kitei ki kali ka la jur ruh, da ka jingïakren sngew thuh jingmut hapdeng jong ki baroh ar ngut ki la poi sha ka jingïasuk ïasaiñ khlem kano ka jingbuhkhoh.
Haba phai ha ka jing ïatyngkhuh kali khah khah ha katei ka jaka ym lah ban len ba ka jing kynnoh ka dei ïa ka PWD ba kam shym la shimkhia ne peit bniah ïa ka jinglong jingman jong ka surok ba ha kiba kum kino ki jaka dei ban buh ïa ki sign board ba ki nongñiah kali kin tip ïa ka jinglopng jingman jong ka surok.
Ha ka jingshisha ha katei ka jaka ha Jeidohkroh kaba ba la buh ïa ki speed braker ka dei ban pynïeng da ne pynïeng kano kano ka sign board ne ka jingpyni dak ba don speed braker ha katei ka jaka.
Kawei pat kaba kham sngewsih ka long ba ki paitbah ba ïaid ba ïeng lyngba ka surok bah NH 44(E), haduh kine ki sngi ki dang don ïa ki jingmut jingpyrkhat kum ki shrieh, namar haba ka sorkar bad ka company shna surok ka la buh ïa ki jingai dak ha ki rud surok, tang hadien katto katne sngi ki la jot ki la pei bad ki don ruh kiba la shah kyndang bad bret sha khlaw.
Ia katei ka jinglong shrieh jong ki briew haduh mynta ym pat lah ban pynssgewthuh bad ym don ba lap ba kitei ki buit kti buit kjat ki dei kiei bad ki wan nangno. Na ka bynta ban pynsngewthuh ïa ki ka dei ka kamram jong ka dorbar shnong ba kin ai da ki prokram ban pynshai paitbah khnang ba kin sngewthuh.
